Cardiff MS. 1.363 (Hafod 2) – page 192v
Brut y Brenhinoedd
192v
1
a seyth escobaỽt en kadarn o eglvryon pre+
2
ladyeyt credyfvs glan wuchedaỽl a llaw+
3
er o vanachlogoed en rey ed oedynt keynỽey+
4
nhoed y dyw en kynhal vnyaỽn reol ac ỽrdas.
5
Ac em plyth er rey henny en dynas bangor ed
6
oed manachloc vonhedyc en er hon e dywedyr
7
bot e ỽeynt honn o kỽuent. gwedy rennyt en
8
seyth rann. e bydynt try chant mynach em pob
9
rann. sef oed eyryf henny oll y gyt kant a dwy
10
vyl y gyt ac eỽ pryoryeyt ac ev preladyeyt en
11
ossodedyc ỽdvnt. A|henny oll en bwchvedv o laf+
12
ỽr eỽ dwylaw. A dvnaỽt oed abat arnadvnt Gwr
13
anryved y dysc en|e kelvydodeỽ oed hwnnỽ. Ar dv+
14
naỽt hwnnỽ pan keyssyaỽd aỽstyn y gan er eskyb
15
darystynghedyaeth ydav ef ac annot|vdvnt pr+
16
egethỽ y gyt ac ef yr saysson. enteỽ a dangosses
17
trwy amravalyon argỽmennev. ac avdvrdev
18
er yscrythvr glan hyt na deleynt wy darystw+
19
ng ydaỽ ef. kanys archescob oed vdvnt e|hvne+
20
yn a bot kenedyl e saysson en dwyn tref eỽ tat
21
y arnadvnt. Ac|wrth henny dyrỽaỽr kas oed er+
22
ryngthvnt. ac ny dodynt messvr ar eỽ cret. na
| « p 192r | p 193r » |