Cardiff MS. 3.242 (Hafod 16) – page 11
Rhinweddau Bwydydd
11
*pell y|ỽrth y|gỽyd os o|wyd aeduet y henuyd ny byd
un|drỽc arnaỽ. Mel gỽressaỽc yỽ a sych. da yỽ y|dyn+
yon oeruelaỽc gỽlyboraỽc hen. gỽaet da a|wna a|cha+
darnhau gỽres anyanaỽl. Ny|dygymyd a|dynyon
Jeueingk. nac a rei gỽressaỽc sych. meithrin malen+
colia a heineu gỽressaỽc tawel a|wna. ac yn bennaf yr
haf. a|chynt yd a yn golera noc yn waet da. yn|y ryỽ gor+
fforoed hynny ỻaessu a|wna a thost yỽ. sychet a|wna
y|r neb a|vỽytao ỻawer o·honaỽ ac alaru a gloesson chỽ+
yt. Halen; gỽressaỽc yỽ yn|yr eil rad a|sych yn|y dryded.
Dỽy genedlaeth yssyd o|r|halen. vn man ac un bras. a|go+
reu yỽ|r man. kanys gloeỽ vyd a|chyuartal. a hỽnnỽ
a|elwir halen metael. Y bras a|elwir halen moraỽl. ka+
nys o grondỽfyr y morbyỻeu y byd neu o heli y|mor
gỽedy ỻanwer yr haf. a goreu vyd o|r byd gỽynn. pob un
ohonunt a lanhaa ac a|dissycha gormodder y|gỽlyboreu
pỽdyr ac a|geidỽ y|gỽlybỽr anyanaỽl. ac a|gae tyỻeu y
corff. ac a|dỽc blas ar vỽyt. Mỽstard gỽressaỽc a sych
yỽ yng|kenaỽl y dryded rad. ef a|dissycha gỽlybỽr y|penn
a|r kyỻa. a|glanhau y kyỻa a|wna. a|r|gỽlyboreu pỽdyr
llyfedic. Crỽnginor; gỽressaỽc yỽ yn|y rad gyntaf.
gỽlyboraỽc yn yr eil. ny dygymyd a dynyon gỽressaỽc
gỽlyboraỽc. nac a|rei gỽressaỽc sych. a|dynyon oeruelaỽc
herwyd anyan y|dygymyd. kanys nerthau a|ỻeithaỽ a
wna grym eu dilifraỽns. Pybyr gỽressaỽc ynt a sych
yn|y|dryded rad. da ynt y dynyon y bo kyỻa oerwlyb udunt
ac y|lanhau dỽyvronn ac ysgeueint o|r|fleuma gỽaret my ̷+
The text Rhinweddau Bwydydd starts on line 1.
| « p 10 | p 12 » |