Breudwd Welsh Prose 1300-1425
Cymraeg

NLW MS. Llanstephan 27 (The Red Book of Talgarth) – page 105r

Y Groglith

105r

gyt ohonunt. y dywaỽt pilatus. Pa vn a vynnỽch chỽi y adu.
yỽch ae barraban ae iessu yr hỽnn a|elwir crist. kanys
gỽydyat panyỽ trỽy gynghoruynt y rodassynt ỽy ef yno.
ac ual yd oed yn ỻe braỽdỽr yr anuones y wreic attaỽ y erchi
idaỽ nat ym·yrrei yng|gỽaet y gỽirion hỽnnỽ. ỻawer heb hi
a|odefeis i hediỽ trỽy vy hun am·danaỽ ef. Tywyssogyon yr
offeireit a|r hyneif eissyoes yn annoc y|r bobyl erchi barra+
ban. a|dihenydyu iessu. ac atteb udunt a|oruc y raclaỽ. Pa vn
o|r|deu a|vynnỽch chỽi y adu. Barraban heb ỽynteu. Pa beth
a|wnaf inneu heb·y pilatus am iessu yr hỽnn a dywedir crist.
Crocker ef heb ỽynt. Pa|drỽc a|wnaeth ef heb·y pilatus. Ac
yna kadarnach gadarnach yr erchynt y grogi ef. Pan|weles
pilatus na thygyei idaỽ. namyn yn vỽy o deruysc. kymryt
dỽfyr y ymolchi a|oruc. a|dywedut yng|gỽyd y bobyl. Diargy+
wed ỽyf|i o waet y gỽirion hỽnn. a|gỽrtheb a|orugant ỽynteu. Y
waet ef bit arnam ni ac ar yn meibyon gỽedy ni heb y bo+
byl. Ac yna y|goỻyngaỽd ef baraban. ac y rodes iessu yn
boenedic y grogi. ac ymgynnuỻaỽ a|orugant marchogyon
y raclaỽ. a|r hoỻ bobyl o amryuaelyon gynnuỻeituaeu att
Jessu. ac y dugassant idaỽ manteỻ goch ac y gỽisgassant
ymdanaỽ. a phlethu coron o drein yspydat a|e dodi am y benn.
a rodi prenn corsen yn|y laỽ deheu yn ỻe teyrnwialen idaỽ.
a gostỽng ar eu glinyeu rac y vronn. a|dywedut ỽrthaỽ dan
geỻweir. Henpych gỽeỻ vrenhin yr idewon. a phoeri arnaỽ
a chymryt y gorsen o|e laỽ a|e vaedu a hi ar y benn. A gỽedy
y wattwaru ueỻy. diosc y uanteỻ goch y ymdanaỽ. a|e wisgaỽ
o|e|diỻat e|hun. a|e dỽyn y grogi. A phan yttoedynt yn mynet
ac ef.