NLW MS. Llanstephan 27 (The Red Book of Talgarth) – page 129r
Ystoria Titus
129r
o amser mel a|chaỽs. Yna y talaỽd yr amheraỽdyr y ueronic
drych yr arglỽyd. ac enryded maỽr. a|e hanuon hyt y gỽlat
y·gyt a chennadeu kywir. A|gỽedy bot pilatus yn hir gar+
char. gỽediaỽ y athro a|oruc y dỽyn y edrych y·chydic ar y
goleuat. A phan doeth y|r ỻe yd ymgannoed arganuot y
gnaỽt yn du a|oruc ual haearn ry losgei. Ac yna yd erch+
is pilatus a·ualeu y athro. A|gỽedy kaffel yr aualeu yd
erchis kyỻeỻ y biliaỽ yr aualeu. a gỽedy kaffel y gyỻeỻ y
sengi dan benn y vronn a|e lad e|hun. Pan arganuv po+
byl y dinas hynny y gladu a|orugant o·dieithyr y dinas
yn diffeithỽch ny ry gladyssit dyn yndaỽ eiryoet. A
thrannoeth y bore yd oed ef ar wyneb y daear. kanny bu
deilỽng gan y daear y erbynyeit. ac ueỻy y gỽnaethant
hyt ym|penn teirgỽeith. ac yna y cladyssant ef y myỽn
heb mur maen. ac yno heuyt teirgỽeith y cladyssant ef.
ac o|e drew·yant ef y clefychynt o grỽt* a chwyt a gỽenỽyn.
paỽb o|r a ymgarhaedyei a|r ỻe hỽnnỽ hyt ar eu hangeu.
Ac odyna y doeth y*|doeth* pobyl y|dinas ac y hebryngassant
ef hyt yn auon rodỽm. a rỽymaỽ mein pỽysuaỽr am y
vreuant. a|phlymv y gorff oỻ. ac odyna pob ỻong o|r a
gerdei hebdaỽ a beriglei ac a|sodei yn|yr auon. A gỽedy
honni hynny y bobyl y wlat. gossot dyrwest dri phryt a
orugant y wediaỽ duỽ. hyt pan uei y gỽr a|e differassei ỽ+
ynt rac pilatus yn vyỽ. a|e differei ỽynteu racdaỽ ef yn varỽ.
a mynet a|orugant y myỽn ỻongeu. a chymryt bacheu
heyrn y geissyaỽ y corff. A gỽedy eu bot yn crỽytraỽ yn
hir am·danaỽ y kaỽssant a|e dynnu o|r dỽfyr a|wnaethant.
| « p 128v | p 129v » |