NLW MS. Llanstephan 27 (The Red Book of Talgarth) – page 57r
Ystoria Adrian ac Ipotis
57r
y dysgu dynyon andeaỻus disynnhỽyraỽl. Poet kyflaỽn
vych heb yr amheraỽdyr o gyfreitheu duỽ a|e doethineb.
Doeth yỽ heb y mab a ymogelo rac pechodeu marỽaỽl.
ac a enniỻo nefaỽl drugared. O|th gyfarchaf uab tec heb yr
amheraỽdyr pỽy yỽ dy enỽ di. Jpotis heb y mab y|m gelwir
o achaỽs gỽybot ohonaf gyfarỽydyt o nef. Dywet ym uab
beth yỽ nef. Rin dirgelỽch duỽ. Pa|beth yỽ duỽ heb yr amher+
aỽdyr. Duỽ yssyd heb dechreu idaỽ. ac a|vyd heb diwed arnaỽ.
Yr amheraỽdyr yna a|ovynnaỽd y|r mab. kan wyf mor an+
hyspys. Pa beth gyntaf a|doeth o eneu|duỽ. Ynteu a|dywaỽt
mae euengyl ieuan. yn|tystu mae Jn|principio erat uerbum
a dywaỽt iessu gyntaf. Sef yỽ hynny. yn|y dechreu yd oed geir.
Sef oed hynny. yn|y tat duỽ yd oed mab. kanys geir duỽ oed
y vab. ac ygyt a|r|geir yr oed y tat a|r mab. a|r yspryt glan. a|r
teir person yn y|drindaỽt. ac yn vn duỽ. ny digaỽn yr vn o+
nadunt vot y ỽrth y gilyd. Yr amheraỽdyr a|dywaỽt yna. O
uab tec ti a vuost yn|y nef. pa saỽl nef yssyd y hoỻ·gyuoeth+
aỽc duỽ. Seith y maent. ac yn|y nef goruchaf yssyd y mae
y|drindaỽt o|nef. y tat a|r mab a|r yspryt glan yn deir per+
son ual y dywetpỽyt uchot. ac ny dichaỽn neb ỻeyc nac ys+
golheic dyaỻ meint y ỻewenyd yssyd yno. Yr|eil nef yspryda+
ỽl yỽ. yssyd o rad is no hỽnnỽ. a|diogel yỽ ytti. neb dyn na
dichaỽn dywedut y ỻewenyd yssyd yno yny yspeiler o|e ỻeỽ+
enyd dyd·braỽt. a|r trydyd nef a lewycha ual cristyal yn ỻa+
ỽn o velyster ỻewenyd damunedic o achaỽs perigloryon
a chonffessoryeit yn|gỽassanaethu duỽ hoỻ·gyuoethaỽc. ~
Pedweryd yỽ nef euraỽl yn ỻaỽn o|vein arderchogyon rin+
| « p 56v | p 57v » |