NLW MS. 3035 (Mostyn 116) – page 194v
Brut y Tywysogion
194v
ap kynan. Ac o powẏs gỽenỽynỽn ap ywein kyueilaỽc a ma+
redud ap rotbert o gedewein a theulu madaỽc ap gruffud mae+
laỽr a deu vab mael·gỽn ap katwaỻaỽn o deheubarth mael+
gỽn ap rys a rys gryc y vraỽt. a rys jeuanc ac ywein vei+
bon gruffud ap rys. a ỻyma enweu y cestyỻ a oresgynỽyt
ar yr hynt hono nyt amgen casteỻ sein henyd. casteỻ ket+
weli kaer vyrdin ỻan ystyffan. seint cler talacharn
trefdraeth aberteiui kilgeran ac ar yr hynt hono y
bu araf hedỽch a|tegỽch hinon y gayaf hyt na welat
ieiroet* kyno hyny y kyryỽ* hinda hono. ac yna y bu kyfrann
o tir y·rỽg maelgỽn ap rys a rys gryc y vraỽt. a rys ac y+
wein meibon gruffud ap rys yn aber dyfi gyr bron. ỻywelyn. ap
joruerth. gỽedy dyfynu y·gyt hoỻ dywyssogyon kymrẏ. a hoỻ
doethon gỽyned. ac y vaelgỽn ap rys y doeth tri chantref
o dyfet nyt amgen y cantref gỽarthaf. a|chantref kemeis
a chantref emlyn a phelunyaỽc a|chasteỻ kil gerran ac
o ystrattywi kasteỻ ỻan ymdyfri a deu gymỽt. nyt am+
gen hir vryn a|maỻaen a maenaỽr vyduei. ac o geredigyawn
deu gymỽt gỽynyonyd a mabwynyon. ac y rys jeuanc ac
y ywein y vraỽt. Meibon gruffud ap rys y deuth casteỻ a+
berteiui a chasteỻ nant yr|aryant a|thri chantref o geredi+
gyaỽn. ac y rys gryc y|deuth y cantref maỽr oỻ eithẏr malla+
en a|r cantref bychan eithẏr hirurẏn a myduei. ac idaỽ y
deuth ketweli a|charnywyỻaỽn hefyt. Yn|y vlỽẏdẏn hono y
hedẏchaỽd gỽen·ỽynỽn arglỽyd powys a jeuan vrenhin ỻoegyr
wedy tremygu y|ỻỽ a|r aruoỻ a|rodassei y tywyssogyon ỻoe+
gẏr a|chymrẏ a|thori yr ỽrogaeth a roessoed y lewelyn ap jorwerth
a madeu y|gỽystlon a rodassei ar hẏnẏ a gỽedy gỽybot o|ỻy+
| « p 194r | p 195r » |