NLW MS. Peniarth 11 – page 175r
Ystoriau Saint Greal
175r
ny|th amdiffynnỽn racdaỽ. Y caryat hỽnnỽ heb hi a dyly bot
bot* yn|gyfredin gan bop marchaỽc urdaỽl. a|thi a|wnant* hynny
yr vn araỻ. Arglỽydes heb·y paredur ef a|r aỻei vot. Eissyoes ef
a|r|aỻei y varchaỽc urdaỽl garu vn yn vỽy no|e gilyd. Yr arglỽy+
des a|vynnei idaỽ ef ymdiriet ac ymgredu idi yn vỽy noc yd|o+
ed. a phei vỽyaf yd edrychei hi arnaỽ ef. mỽyaf yd ennynnei
hitheu o|e garyat ef. Eissyoes paredur nyt yttoed yn medylyaỽ
dim o|e|charu hi. Yr arglỽydes heuyt a|edrychaỽd arnaỽ yn ỻa+
wen rac y decket. ac nyt yttoed hi yn gỽelet arnaỽ ef dim tebic
ar y charu hi. Ac yna ỻaỽ·vorynyon yr|arglỽydes a|oedynt yn
ryuedu yn vaỽr bot y wreic wedy ysgaelussaỽ y dolur a|e grid+
uan am y hewythyr. ac ar|hynny nachaf clamados yn|dyuot
gỽedy dywedut o vn ỽrthaỽ bot y marchaỽc a|ladyssei y dat yn|y
pebyll yno. ac arganuot a|wnaeth ef y marchaỽc yn eisted
yn ymyl y vrenhines. a hitheu yn edrych yn|y lygeit ef. ar+
glỽydes heb ef ys maỽr a|gewilyd y gỽbỽl o|th genedyl yr ỽyt
ti yn|y wneuthur. pan|diodefych dy elyn y eisted y|th ymyl. ac
ny dylyei neb ymdiriet y|th garyat ti. Clamados heb y
vrenhines y marchaỽc a|doeth yma y lettyu. ac am hynny ny
dylyaf|i wneuthur chweith drỽc idaỽ. ony wney etto beth a
aỻer y roi yn|y erbyn. neu brofi arnaỽ ynteu wneuthur tỽ+
yỻ neu vurndra. Arglỽydes heb·y clamados ef a|ladaỽd
vyn tat i. yn ffyrnic heb y rybudyaỽ megys tỽyỻỽr bratwr.
ac ny bydaf|i hyfryt na ỻawen vyth yny dialwyf arnaỽ hyn+
ny. a ỻyma vy apel i arnaỽ ef ar y vot yn vratwr tỽyỻỽr. ac
yd ỽyf|inneu yn adolỽyn itti wneuthur a|mi gyfyaỽnder. ~
Ac nyt yttỽyf yn erchi megys y dlaỽt wneuthur a|char. ~
| « p 174v | p 175v » |