NLW MS. Peniarth 12 part ii – page 55r
Ystoria Lucidar
55r
boent y|tat a|r yspryt glan yn|kytlauuryaỽ ac ef. discipulus a oes yno
eistedua idaỽ ynteu. megys y|dywedir. ef a|eisted ar|eistedua
y|uedyant. Magister Crist a|seif y ymlad dros y wreicbỽys. a gỽedy
gorchyvycko ef y elynyon. a|chymryt y wreicbwys attaỽ yd eisted
ef yn|y vedyant. Sef yỽ hynny dynolyaeth yn|gorffowys y
myỽn dwywolder. ac eissyoes ar yr eglỽys yỽ peri o|e eglỽys
orffowys o|e hoỻ lauuryeu. ac eissyoes kanys ymdengys dyn
yno. ef a|gredir eisted o·honaỽ ual braỽdỽr ar|eistedua a
gymero o|r awyr. discipulus A vyd eisteduaeu yr ebystyl yno. megys
y dywedir. chwi a|eistedỽch ar|deudec eistedua. Magister Eu|kyt·wy+
bot ỽy vyd eu heisteduaeu. yn|y rei gỽedy gorchyfygu y|byt
a|e|wydyeu. megys budugolyon y gorffwyssant yn eu heisted+
uaeu. ac ef a|welir eisted ohonunt ar eisteduaeu o|r awyr.
megys y|dywedir. wynt a|eistedant yn|y vraỽt ar yr|eistedua+
eu. discipulus Pa|ffuryf y byd y braỽt. Magister Kymysgedic ynt yr aỽr·honn
a|drỽc a|da. ac ef a|debygir bot yn|da y rei drỽc. a bot yn|drỽc
ỻawer oc yssyd da. yna hagen y gỽahana yr engylyon y rei
da y ỽrth y rei|drỽc megys y graỽn y ỽrth y peisswyn. Ac y+
na y gỽahenir ỽynt yn bedeir|grad. vn o|r rei perffeith y
uarnu ygyt a|duỽ ar y ỻeiỻ. ac araỻ o|r rei gỽirion a|wneir
yn iach drỽy y varn. Y dryded o|r rei enwir a|ant y|nghyfyrgoỻ
heb varn. Pedwared o|r rei drỽc a|ant y|nghyvyrgoỻ drỽy ~
varn. discipulus Pa rei ynt y rei a varnant. Magister Yr ebystyl a|r merthy+
ri a|r myneich a|r gỽerydon. discipulus Pa delỽ y barnant ỽy y|rei
gỽirion. Magister Dangos a|wnant bot ohonunt ỽrth eu dysc.
a|e hangreifft. ac ỽrth hynny teilỽ·ng ynt y|r deyrnas. discipulus Pỽy
y rei a vernir Magister Y rei a|wnaethant weithretoed y drugared yn|y
| « p 54v | p 55v » |