NLW MS. Peniarth 32 (Y Llyfr Teg) – page 211
Llyfr Iorwerth
211
yn vn gerdet ac ef. neu da araỻ. neu rac y vron.
kystal yỽ hynny a ỻedrat yn ỻaỽ. Trydyd yỽ;
o cheffir ỻedrat yn ỻaỽ dyn. neu ar y gefyn.
neu wedy y vỽrỽ y|r ỻaỽr. am bop vn o hynny
reit yỽ ardelỽ kyfreithaỽl y vỽrỽ y ỻedrat y ỽrthaỽ.
neu ynteu a vo ỻeidyr kyfadef. O|deruyd. y dyn
sarhau gỽenigaỽl o gaeth; pedeir ar|hugeint
yỽ y sarhaet. Sef yỽ gỽenigaỽl; kaeth a uo
yn ty uchelỽr y raỽ a fforch. sef yỽ hỽnnỽ kaeth
dofaeth. yr hỽn a drickyo y·gyt a|r vchelỽr heb
y brynu heb y wahaỽd. a|gỽerth hỽnnỽ yssyd
deu kymeint a chaeth a brynher. O|deruyd. ỻad ka+
eth na gỽenigaỽl vo nac araỻ. neu ynteu y
dỽyn yn ỻedrat a|e wadu; ỻỽ pedwar|gỽyr ar
hugeint a|e gỽatta a|r neiỻ hanner yn wyr not.
kanys am bop ỻedrat y dylyir y neiỻ hanner
yn wyr not. O|deruyd. y wenigaỽl o gaeth dyuot
y ty vchelỽr. a|chymryt tir y ganthaỽ a daly
ty. a thalu tỽngk a|gỽestuaeu o|e arglỽyd;
hanner gỽerth aỻtut brenhin vyd y werth
ynteu o hynny aỻan yn aỻtut uchelỽr brein+
yaỽl. O|deruyd. ymderuynu y·rỽg perchen dỽy va+
gyl. ae ỽynt yn abadeu. ae ỽynteu yn esgyb. yr
uchaf y vreint bieu teruynu. Os gogyfuch
vydant; yr hỽn a vo kynwarchadỽ onadunt
bieu teruynu gan y lỽ o|e vagyl a|e euegyl.
| « p 210 | p 212 » |