NLW MS. Peniarth 36A – page 10r
Llyfr Blegywryd
10r
yỽ; offeirat y·rỽg y deu dyn plỽyf am yr
hyn a tystassant idaỽ kyn no hynny. Seith ̷+
uet yỽ morỽyn am y gỽyrdaỽt. os y gỽr
y rodet idaỽ ae hameu yr gỽaethau y
breint. credadỽy yỽ hi o vyỽn y deudeg
mlỽyd. Os gỽedy y deudeg mlỽyd. y llỽ ar
y phymhet or dynnyon nessaf idi a dyry
Or treissir morỽyn hagen. a dywedut or
treissỽr nat oed vorỽyn. Tystolyaeth y vor ̷+
ỽyn e hunan a gredir yn| y erbyn am y
morỽyndaỽt. Vythuet yỽ bugeil trefgord
am lỽdyn a lathont yscrybyl y tref yn| y
ỽyd ac yn| y warchadỽ. Naỽuet yỽ lleidyr
ỽrth y groc pan vo diheu gantaỽ y grogi.
credadỽy vyd heb greir ar y gytleidyr. ac
am yr hyn a duc yn lletrat. y gytleidyr
hagen ny byd crogadỽy yr geireu y llall.
namyn lleidyr gỽerth. LLeidyr
am letrat kyssỽyn or palla reith gỽlat
idaỽ; dirỽyus vyd Credadỽy vyd amo+
dỽr yn| y amot rỽg deu dyn ae hadeffo.
Ac velly rodaỽdyr da am yr hyn a rotho.
Ac ỽrth hynny y| dywedir nyt oes o rod
| « p 9v | p 10v » |