NLW MS. Peniarth 46 – page 138
Brut y Brenhinoedd
138
ac gỽedy digyuoethogi eudaf yr ae+
th ef hyt yn llychlyn. a thra yttoed
ef ar y|dehol hỽnnỽ. Sef a|oruc ef a ̷ ̷+
daỽ gann getymeithon a|e gereint y|ge+
issaỽ diua trahayarn. a|sef a|oruc iarll
y castell cadarn. canys mỽy y carei ef
eudaf no neb. ac ual yd oed trahayarn
diỽarnaỽt yn mynet o lundein. sef a
a*|ỽnaeth y|iarll hỽnnỽ. a|chant march ̷+
aỽc gyt ac ef. llechu y|myỽn glynn coe+
daỽc y|fford y doei trahayarn. ac yn|y
lle hỽnnỽ y|llas trahayarn. a|phann gi+
gleu eudaf hynny. ymhoelut a|oruc
dracheuen ynys. prydein. a|gỽasgaru y|rufeinỽyr
ohoni. a|gỽiscaỽ e|hun a oruc coron y|teyr+
nas. ac ar|uyrrder ymgyuoethogi o|eur
ac aryant. a daoed ereill hyt nat oed
caffel neb a|uei arnaỽ y|ouyn. ac o|hyn+
ny allan y|kynnelis ef. ynys. prydein. rac paỽb
hyt yr amser y|buant. Gracian. a|ual ̷+
ỽnt yn amherodron yn ruuein. ̷ ̷
| « p 137 | p 139 » |