NLW MS. Peniarth 46 – page 20
Brut y Brenhinoedd
20
vdunt. ac os hynny a geffynt kym ̷+
ryt cannyat y|vynet y le y gellynt ca+
ffel hedỽch tragyỽydaỽl. a gỽedy dar+
uot teruynu ar yr ymadraỽd hỽnnỽ
vuudhau a|oruc yr holl gynnulleitu·a
y hynny. a|dỽyn y brenhin y berned y
niuer. a dodi pandrasus y|myỽn cadeir or+
vchel val y|dylyei vrenhin. a gỽedy gỽe+
let ohonaỽ gogyuadaỽ y agheu. atep
a|oruc yn|y ỽed honn. kanys tyghet+
uen a|m|rodes yn|y·ch|llaỽ chỽi dir yỽ y
mi ỽneuthur aỽch eỽyllys chỽi a|ch
mynnv rac colli vy muched yr honn
nyt oes a|uo gỽerthuorach ym no hi.
a chyt boet gỽyrthỽyneb gennyf|i rodi
vy merch. eissoes mi a|e rodaf y|r gỽas
Jeuanc clotuaỽr hỽnn. a|henyỽ o|etiued
priaf vrenhin tro. ac anchises. a|r bon ̷+
hed ysyd yndaỽ yntev yn blodeuaỽ val
y|gỽelir yn amlỽc. a|phỽy a allei rydh ̷+
au gỽyr tro o|r hir geithiỽet honn yn
| « p 19 | p 21 » |