NLW MS. Peniarth 46 – page 84
Brut y Brenhinoedd
84
ynteu y doeth idỽal mab oỽein y gar yn|y
le. a|hỽnnỽ a|ỽnaeth iaỽnder a gỽironed
rac ouyn damỽein y lleill. ac yn ol idỽ+
al y doeth run map peredur. ac yn ol
run gereint ap elidyr. ac yn ol gereint
cadell y uap ynteu. ac yn ol cadell y doeth
coel. ac yn ol coel y|pu porrex. ac y|r por+
rex hỽnnỽ y|bu tri meip. ffulgen. ac ei+
dal. ac andryỽ. a|rei hynny a|ỽledychỽys
pob un ỽedy gilyd. ac yn|y hol hỽynteu
y doeth uryen mab andryỽ. ac yn|y ol
y doeth elỽyt. ac yn ol elỽyt cledaỽc. ac
yn|ol cledaỽc clydno. ac yn ol clydno go+
rỽst. ac yn ol gorust. meiraỽn. ac yn
ol meiraỽn. bleidud. ac yn ol bleidud;
caph. ac yn ol caph. oỽein. ac yn ol oỽ+
ein. seissyll. ac yn ol seisyll. blegyỽryt.
ac ny bu eiroet yn|yr oessoed hynny ka+
nyhadỽr kystal ac ef. ac achaỽs hynny
y|gelỽit duỽ y|gỽaryeu. ac yn|y ol yntev
y doeth rydyon. ac yn|ol rydyon. Ryderch.
| « p 83 | p 85 » |