Cardiff MS. 1.363 (Hafod 2) – page 139r
Brut y Brenhinoedd
139r
odyna er yarll en agkyghorwssach a deỽ+
th a|e ỽarchogyon y gyt ac ef allan kan teb+
ygỽ o·honnaỽ gallỽ o nyfer bychan ymer+
bynneyeyt a gwrthwynebỽ yr saỽl ỽarch+
ogyon arỽaỽc a oedynt en eỽ herbyn. Ac
odyna gwedy dechreỽ ymlad o pob parth
ene* e|lle em plyth er rey kyntaf e llas Gwrl+
eys ac gwaskarassant y kytymdeythyon. ac
e kaffat e kastell ed oedynt wrthaỽ. ar da oed
endaỽ en agkyffredyn er rannwyt. kanys p+
aỽb megys yr ranney e tyghetỽen ydav a|e
kymerey. Ac gwedy darỽot e kyfranc ar d+
amweyn hỽnnỽ kennadeỽ a deỽthant at ey+
gyr er rey a ỽynagassant ydy ry lad yr yarll
ar ry kaffael e kastell. Ac eyssyoes gwedy gwe+
let onadỽnt e brenyn en ryth Gwrleys en ey+
ste y gy·t a hy erdang a brav a aeth arnadvnt.
ar ryỽedỽ e gwr a edewessynt gwedy yr ry
lad en|e ỽrwydyr gwelet hỽnnỽ en ỽyw ac
en yach oc eỽ blaen eno. Ny wydynt wy h+
agen y medegynaetheỽ ry gwnathoed me+
rdyn. ac en erbyn hagen e chwedleỽ hen+
ny chwerthyn a gwnaey e brenyn. ac y
gyt ar geyryeỽ hynn dody y dwy laỽ eg
| « p 138v | p 139v » |