Oxford Jesus College MS. 57 – page 84
Llyfr Blegywryd
84
1
lỽrỽ. o diuỽyn yr haỽl o|r a berthyno ỽrth y|geir.
2
y tystỽyt o|e waỻ. Tri theruyn haỽl yssyd. gỽa+
3
du. neu brofi. neu lyssu|tyston. Tri pheth ny
4
chyngein yng|kyfreith. praỽf ar weithret na+
5
myn|tri. a|gỽat dros waessaf. a|chof wedy bra ̷+
6
ỽt. Tri gỽeithret yssyd ar braỽf. ỻauur kyfrei ̷+
7
thaỽl. neu anghyfreithaỽl ar tri*. Megys torri
8
ffin. neu wneuthur ffin. neu lauur araỻ. a
9
gỽeithret ỻỽdyn yn|ỻad y|ỻaỻ yng|gỽyd bugeil
10
trefgord. Tystolyaeth y bugeil yn wybydyat a
11
seif am hynny. Tystolyaeth heuyt a|seif am|tir
12
a|gỽeithret kytleidyr a|grocker am ledrat. tysto+
13
lyaeth hỽnnỽ ar y gytleidyr a|seif. Tri gỽaes+
14
saf yssyd. ardelỽ. neu warant. neu amdiffyn
15
heb warant. Tri chof wedy braỽt yssyd. godef o
16
vraỽdỽr gỽystyl yn|y|erbyn ac yn erbyn y vraỽt.
17
heb rodi gỽrthwystyl yna. a gỽedy hynny. kynnic
18
gỽystyl o|e gadarnhau. ny dylyir y erbynnyaỽ
19
o gyfreith. o·ny byd braỽt tremyc neu gynnic gỽ+
20
ystyl yn erbyn braỽt. gỽedy godef neu adaỽ ym+
« p 83 | p 85 » |