NLW MS. Llanstephan 27 (The Red Book of Talgarth) – page 54v
Breuddwyd Pawl, Epistol y Sul
54v
1
bronn duỽ y adolỽyn idaỽ roi gorffowys duỽ sul y|r enei+
2
deu a|odynt yn uffern. Mi a|e rodaf heb yr arglỽyd iessu
3
yr mihangel ac yr paỽl ebostol. ac yr vyn daeoni vy hun
4
orffowys udunt. o aỽr naỽn duỽ sadỽrn hyt ar aỽr
5
brim duỽ ỻun. Ac yna dyrchafel y ar y poeneu a|oruc e+
6
tyrnal dryssaỽr uffern. a cerebius y gi. a|thristau yn uaỽr
7
a|oruc. a ỻawenhau a orugant y niuer a|oedynt yn uffern.
8
a dywedut y·gyt oỻ. Nyni a|dywedỽn dy uot ti yn uab y duỽ
9
byỽ. kann rodeist ti ynni orffowys duỽ sul e|hun. Ac ỽrth
10
hynny pỽy bynnac a anrydedo duỽ sul ef a vyd kyfranna+
11
ỽc ar orffowys y·gyt ac engylyon nef. Ac yna y govynnaỽd
12
paỽl y|r angel. pa saỽl poen a|oed yn uffern. a|r angel yna a
13
dywaỽt. pet uei bedeir|mil a|deugein mil a|chan|mil. yn rifaỽ
14
poeneu uffern. a phedwar tauaỽt haearnaỽl ym|penn pob
15
un ohonunt. ny pherheynt yn rifaỽ poeneu uffern. ỽrth
16
hynny pỽy|bynna o·honam ni a|glywo meint poeneu po+
17
byl angkredadỽy. a meint ỻewenyd eneidyeu kyfyaỽn
18
buchedaỽl. a meint a|diodefaỽd crist yrom ni. nyt amgen
19
coỻi y waet yn wirion yr caryat ar gristonogyon. ninneu
20
a|dylyem haedu y vodyant ef. ual y kaffem buched dragy+
21
wydaỽl yn|teyrnas gỽlat nef. ameN
22
ỻyma ebostyl y sul.
23
L *Lyma yr achaỽs y|daỽ bar duỽ yn aỽch plith. a me+
24
thyant ar ych ỻauur ac ar a|vedoch o|da. ac y daỽ po+
25
byl y paganyeit y dodi ych kyrff yng|keithiwet achubedic.
26
o achaỽs na chedỽch duỽ sul santeid bendigedic. yd amylha+
27
ant yn aỽch plith cripdeilogyon vleideu. a|chỽn kandeiryaỽc.
The text Epistol y Sul starts on line 23.
| « p 54r | p 55r » |