NLW MS. Llanstephan 27 (The Red Book of Talgarth) – page 64v
Buchedd Dewi
64v
wyneb di. Sef a|oruc yr athro yna. medylyaỽ a ryuedu
y kewilyd a|dywaỽt y mab. kanys ueỻ y mae heb ef ỽrth
y mab. dyro dy laỽ ar vy wyneb. a bendicka vy ỻygeit a
mi a vydaf hoỻ·iach. A phan rodes dauyd y laỽ ar lygeit
y athro y buant hoỻ·iach. Ac yna y bendigaỽd paỽlinus
dauyd o bob bendith o|r a geffit yn ysgriuennedic yn|y dedyf|hen
ac yn|y neỽyd. Yna y|doeth angel att baỽlinus. a|dywedut
ỽrthaỽ ual|hynn. Amser heb ef yỽ y dauyd sant vynet odyma
y wneuthur y petheu yssyd dynghetuen y gan duỽ idaỽ y
wneuthur. Odyna y doeth dewi hyt yng|glastynbri. ac yno
yd adeilyaỽd ef eglỽys. Dewi a|doeth yr|oed dỽfyr yn ỻaỽn
o wenwyn. ac a|e bendigaỽd. ac a|wnaeth y dwfyr hỽnnỽ yn
dwymyn hyt dyd·braỽt. a hỽnnỽ a|elwir yr|enneint tỽymyn.
Odyna y doeth dewi hyt yng|kowlan. ac hyt yn repecỽn. Ody+
na y doeth y goỻan a glascỽm. Odyna yd adeilyaỽd ef eglỽys
lann ỻieni yng|glann hafren. Odyna y rodes gỽaret y pebi+
aỽc vrenhin erging a|oed yn daỻ. Odyna yr adeilyaỽd eglỽys
yng|gỽent yn|y ỻe a|elwir raclan. Odyna yr adeilyaỽd eglỽys
yn|y ỻe a|elwir ỻann gyuelach yng|gỽhyr. Deu sant a|oed
yng|ketweli. a elwit botucat a nailtrỽm a ymrodassant yn dis+
gyblon y dewi. Odyna yd ymchoelaỽd dewi y|r lle a elwit vetus
rubus. Ac yno yd oed esgob a|elwit goeslan. a hỽnnỽ oed vra+
ỽt ffyd y dewi. a dewi a|dywaỽt ỽrthaỽ. Angel yr arglỽyd a|dyw+
aỽt ymi mae o vreid yd a vn o gant o|r|ỻe hỽnn y deyrnas
nef. ac a|dangossaỽd ymi le araỻ. Ac o|r ỻe hỽnnỽ nyt a neb
y uffern. o|r a vo ffyd da a chret ganthaỽ. ac a|glader y|mynỽ+
ent y ỻe hỽnnỽ heuyt nyt a neb y uffern. a dydgỽeith y
| « p 64r | p 65r » |