Breudwd Welsh Prose 1300-1425
Cymraeg

NLW MS. 3035 (Mostyn 116) – page 135r

Brut y Brenhinoedd

135r

glyỽer bot enỽ brenhin vdunt. syberwach vydant.
Ac eu kiỽdaỽt Ac a ohodant attunt drỽy y rei y gaỻont
distryỽ kenedyl y brytanyeit. kanys yn|wastat y|gno+
ta·assant bot yn vrat·wyr Ac na aỻant kadỽ fydlon+
der ỽrth neb Ac ỽrth hynẏ jaỽnach a|dylyedussach oed
eu kywarsagu ac eu darestỽg y|genhym ni noc eu har+
drychafel. kanys pan ettelis gỽrtheyrn ỽynt yn gyn+
taf megys y ymlad dros y wlat eissoes pan aỻassant
ỽy gyntaf talu drỽc dros da ỽynt a|dangossassant
eu tỽyỻ ac eu brat Ac a|ladassant an kenedyl o dywal aer+
ua. Eilweith ỽynt a vredychassant Emrys wledic Ac vthyr
pendragon. ỽynt a wredychassant arthur. pan duunassant
a Medraỽt Ac o|r diwed ỽynt a|ducsant gotmỽt am
ben credic Ac a|e dehoỻassant Ac a|ducsant y|wlat rac y
dylyedogyon. ~ ~ ~
A  gỽedy dywedut o vreint hir yr ymadrodyon hyny
edifar vu gan gatwaỻaỽn dechreu gỽneuthur yr
amot hỽnỽ A gorchẏmẏn menegi y|etwin na chyt+
synyei y|gyghorwyr ac ef Ac na edynt idaỽ ganhadu
yr hyn yd oed yn|y erchi. kanys yn erbyn defaỽt a gos+
sodedigaeth yr hen|wyrda yr y|dechreu na dylyeit ranu
yr ynys ỽrth dỽy goron. Ac ỽrth hyny sorri a oruc etwin
Ac adaỽ y dadleu a|mynet y yscotlont. A|dywedut y gỽissgei
goron heb ofyn kanhat y gatwaỻaỽn. A gỽedy menegi
hyny y gatwaỻaỽn ynteu a anuones at etwin y venegi
idaỽ o gỽisgei ynteu goron yn ynys. prydein. y|ỻadei ef y ben dan
A  gỽedy bot y|teruysc veỻy y·rydunt ỽynt [ y|goron
a ymgyfaruuont eỻ deu y|parth draỽ y|humyr. a
gỽedy dechreu y vrỽydyr. katwaỻaỽn a goỻes ỻa+
wer o|vilyoed o|wyr A|e gymeỻ ynteu ar|fo Ac yna ẏ