NLW MS. 3035 (Mostyn 116) – page 187r
Brut y Tywysogion
187r
G ỽedẏ marỽ yr arglỽyd rys y dynessaaỽd gruffud y
vab yn|y ol yn ỻywodraeth y kyfoeth yr hỽn a delis
maelgỽn y vraỽt pan doeth y|dywededic vaelgỽn ỽedy
ry|aỻdudaỽ kyno hynẏ o|e gyuoeth a|e wyr y·gyt ac eff a
theulu gỽenỽynỽyn y·gyt ac ỽynt hyt yn aber ystỽyth a
gỽeresgyn y dref a|r casteỻ a|ỻad ỻawer o|e|bobyl a dỽyn ere+
iỻ yg|keithiwet a gỽeresgyn hoỻ geredigyaỽn a|e chestyỻ
a gỽedy dala gruffud y vraỽt yd anuones y garchar gỽen+
ỽynỽyn a hỽnỽ herwyd y ewyỻus a|e|hanuones y garchar
saeson ac yna y goresgynaỽd gỽen·ỽynỽyn arỽystli ac y
delis ỻywelyn ap joruerth. dauid ap ywein gỽyned. Y vlỽydyn
hono y bu varỽ ywein kyueilaỽc yn ystrat marcheỻ wedy
kymryt abit crefyd ymdanaỽ. ac yna y bu varỽ ywein ap
gruffud maelaỽr ac ywein o|r brithdir a hỽel ap jeuaf a|mael+
gỽn ap catwaỻaỽn o vaelenyd. Y vlỽydyn hono y|delit tra+
hayarn vychan o|vrecheinaỽc gỽr arderchaỽc bonhedic
kadarn a|nith y|r arglỽyd rys ẏn briaỽt idaỽ pan oed yn dy+
uot drỽy lancors y lys wilim breỽys y arglỽyd ac y gefyn+
ỽyt yn greulaỽn ac yn aber hodni y|ỻusgỽyt ỽrth raỽn
meirych drỽy yr heolyd hyt y crocwyd ac yno y|ỻas y ben
ac y croget erbẏn y draet ac ar y crocwyd y bu dri dieu wedy
dianc y vraỽt a|e wreic a|e vab ar fo. Y vlỽẏdẏn racỽyneb
y goresgynaỽd mael·gỽn ap rys aber teiui a|chasteỻ ystrat
meuruc wedy mynet gruffud y vraỽt yg|karchar saesson
ac yna yd aeth cofent y cỽm hir y bressỽylaỽ y kymer. Y|vlỽy+
dyn hono y goresgynaỽd y meibon jeuaf y|r arglỽyd rys
gasteỻ dinefỽr. Yn|y vlỽydyn hono yd aruaethaỽd gỽenỽy+
nỽyn geissaỽ talu y hen deilygdaỽt y|r kẏmrẏ a|e hen prio+
| « p 186v | p 187v » |