NLW MS. 3036 (Mostyn 117) – page 123
Brut y Brenhinoedd
123
dỽyeu a enrydedỽn nyt amgen saturnus a|uibitus.
a|r dỽyeu ereill yssyd yn llywyaỽ y byt. Ac eissoes
yn benhaf yd enrydedỽn mercurius yr hỽn a al+
wỽn yn an ieith ni wogen. Ac y hỽnnỽ y parthỽ+
ys an ryeni y pedweryd dyd o|r ỽythnos Ac a al+
wỽn ninheu o|e enỽ ef wogenes. A hỽnnỽ a elwir
yg kymraec duỽ merchyr. Ac yn nessaf y hỽnnỽ
yd enrydedỽn y dỽyes gyffoethoccaf o|r dỽyesseu.
yr hon a elwir effream. Ac y honno y kyssegrỽys
an ryeni y chwechet dyd o|r ỽythnos. Ac yn an ie+
ith ni y|gelwir ffridei. sef yỽ hynny duỽ guener.
Am aỽch cret chwi yr hon yssyd iaỽnach y galỽ yn
agret noc yn gret dolurus yỽ genhyf|i. llawen ỽyf
inheu hagen ỽrth aỽch dyuotedigaeth chwi. ka+
nys amser reit im ỽrthyỽch y dothyỽch na duỽ aỽch
dycco na pheth arall. kanys vy gelynyon yssyd
y|m kywarsagu o pop parth. Ac ỽrth hynny o my+
nnỽch chwitheu kymryt kyt·lauur a miui y ym+
lad a|m gelynyon. minheu ac aỽch kynhalyaf chỽi
yn enrydedus y|m teyrnas. Ac aỽch kyfoethogaf
o amryualyon donyeu a|rodyon eur ac aryant A
meirch a thir a dayar a da arall. Ac yn diannot uf+
ydhau a|wnaethant ỽynteu y hynny. A gỽrhau
y|r brenhin. Ac adaỽ ffydlonder idaỽ trỽy aruoll.
A thrigyaỽ gyt ac ef yn|y lys. Ac yn|y lle nachaf y
ffichteit y elynyon yn dineu o|r alban a llu diruaỽr
y veint gantunt ac yn anreithaỽ y guladoed.
| « p 122 | p 124 » |