NLW MS. Peniarth 11 – page 191v

heuyt. drỽc vu ganthunt. A|r corr a|griaỽd ac a|dywaỽt. ef a

weler heb ef pa|delỽ y dialoch ych coỻet a|ch kewilyd. a|chỽi a

dyly·eỽch gael gogan pryt na aỻeỽch oruot ar vn gỽr. Yna ỽynt

a|e|damgylchynnassant o bop parth idaỽ. ac ynteu a|aeth oc eu

hanuod ỽyntỽy hyt y ỻe y tebygassei gael y varch. ac ny chaf+

as dim ohonaỽ. Ac yna y gỽybu ef panyỽ y corr a|wnathoed y

vrat. ac a|dỽblanaỽd y lit. a|r marchogyon o dra|ỻit a roessant

dyrnodeu trỽm idaỽ. ac ynteu a ym·amdiffynnaỽd racdunt.

G odiwes y corr a|oruc laỽnslot yna. yr hỽnn a|oed yn eu

hannoc ỽy. ac a|e trewis ar y benn yny vyd y cledyf hyt

yng|gỽregis y laỽdyr. ac a annafawd deu o·nadunt ỽynteu. Ac

ynteu e|hun a vriaỽd* yn deu|le. ac ynteu ny wydyat pa vod yr

aei o|r ty rac eissy* y varch. ac nyt oed ar y ty vn drỽs namyn vn.

Y marchogyon a|ffoassant aỻan ac a|ossodassant ar warchadỽ

y drỽs. a|laỽnslot oed o vyỽn y ty gyt a|r|rei meirỽ. Yna efo a|eis+

tedaỽd ym|perued y neuad y orffowys. kanys blin a chlỽyfus

oed o|r dyrnodeu a rodassei. ac a|rodyssit idaỽ. a|r marchogyon

ynteu a|oedynt yn|eisted o bop parth y|r drỽs. Ac ym|penn talym

laỽnslot a gyuodes y vyny. ac a|daflaỽd udunt ỽy y|rei meirỽ

aỻan. A gỽedy hynny ef a|gaeaỽd y drỽs arnaỽ. a|r rei o|r tu

aỻan. a tyngassant nat eynt odyno yny vei varỽ ynteu. ac nyt

oed vaỽr ganthaỽ ef eu bygỽth ỽy. pei cassoedyat y varch. Ac

vedylyaỽd heuyt y gaỻei ef odef arnaỽ eu bygỽth wyntỽy yn

hir o amser. kanys yd oed yn|y neuad digaỽn o vỽyt a diaỽt

hyt ym|penn talym o amser. yno y myỽn y trigyaỽd ef. a|r

pedwar marchaỽc aỻan. Eissyoes pei cassoedyat ef y varch

ny thrigyassei ef yno yrdunt. namyn ef a|aethoed o|e hanuod ỽy