NLW MS. Peniarth 18 – page 34v
Brut y Tywysogion
34v
yr holl yscolheigonn. Y ulỽydyn racỽyneb ỽedy gỽe+
let o|rys ap grufud nat yttoed y|brenhin yn kyỽiraỽ i+
daỽ dim o|r adaỽssei ac na|allei ynteu uuchedockav
ynn adỽyn kyrchu ynn ỽraỽl a|oruc am|benn kyf+
oeth rosser iarll clar y|gỽr y|lladessit einaon ap y+
naraỽt y|nei o|e achos. A|thorri a|oruc castell aber
reidaỽl. A chastell mab|ỽynyaỽn. A|e llosci. Ac at|ores
gynn holl geredigyaỽn. A|mynychu lladuaeu. A
lloscuaeu ar|y|flemisseit. A|dỽyn mynych anreith+
eu y|gantunt. A gỽedy hynny yd ymaruolles yr|holl
gymry ar ymỽrthlad a|cheitỽeit y|ffreinc a|hynny
yn gyuun ygyt. Y ulỽydyn racỽyneb y|diffeithaỽd
dauid ap yỽein gỽyned tegeigyl. ac y|mudaỽd y|dyn+
yon a|e haniueileit ygyt ac ef hyt yn dyfryn clỽyt.
A|gỽedy tebygu o|r brenhin y bydei ymlad ar|y|gestyll
a|oedynt yn tegeigyl. kyffroi llu a|oruc trỽy dirua+
ỽr vrys a|dyuot hyt yn rudlan a|phebyllu yno teir
nos. A gỽedy hynny ymhoelut y loegyr. a|chynnull+
aỽ diruaỽr lu ygyt ac ef o detholedigyon ymladỽyr
lloegyr. A normandi. a|fflandrys. Ac angyỽ. a|gỽas+
gỽyn a|holl prydein. A|dyuot hyt yg|kroes osỽald
gann darparu alldudyaỽ a|diuetha yr holl vryttan+
nyeit. Ac yn|y erbyn ynteu y|deuth yỽein gỽyned
a|chadỽaladyr. meibon grufud ap kynan. a|holl lu gỽy+
ned gyt ac ỽynt. Ar arglỽyd rys ap grufud. a|holl de+
heubarth ygyt ac ef. Ac yỽein keueilaỽc. A ior+
| « p 34r | p 35r » |