NLW MS. Peniarth 32 (Y Llyfr Teg) – page 117
Llyfr Iorwerth
117
araỻ ar vot yn vadeuedic eu kar. a chytuot
tragywydaỽl a dyly bot y·rygthunt y dyd
hỽnnỽ. a thyỻwed tragywydaỽl y·rygthunt.
Llỽ trychanwr a|daỽ o gyfreith y wadu ỻofrud+
yaeth gỽaet a gỽeli. a ỻad dyn. ac ỽrth hynny
y mae iaỽn rodi ỻỽ trychanwr o|e vadeu ynteu.
ac yn tyỻwed y·rỽng y kenedloed y reith a dywe+
dassam ni uchot. Y wadu ỻad dyn o ffyrnigrỽ+
yd; ỻỽ chwechanwr a|daỽ. kanys deu·dyblyc
vyd y wat. a deudyblyc vyd y alanas a|e benyt.
Ac ỽrth hynny pan ladher dyn y serheir yn gys+
seuin. a|r sarhaet honno ny drycheif. ac ỽrth
hynny y mae iaỽn talu y sarhaet honno yn
gynt no|r ala nas. ac os gỽreicaỽc vyd y gỽr;
rodher traean y sarhaet y|r wreic.
a|r deu·parth ranher y|r brodyr a|r kefynderỽ a|r
kyuerderỽ. ac o|r byd byỽ y dat; kymeint idaỽ ac
y deu vroder. ac o|r byd byỽ y vam; kymeint idi
ac y dỽy chwiored. kanys hynny o dynyon a|dy+
lyeynt talu y·gyt ac efo pei sarhaei ef neb araỻ.
a hỽnnỽ yỽ y duỻ goreu. Ereiỻ a|dyweit wedy
yd el y traean y|r wreic; dylyu kymyscu y deu+
parth a|r alanas a|e rannu y|r genedyl. Yr ar+
glỽyd a|dyly traean kymheỻ y sarhaedeu mal
traean y galanasseu. Ny dyly yr yscolheigyon
na|r gỽraged rann o alanas; kanyt ynt dialwyr.
| « p 116 | p 118 » |