NLW MS. Peniarth 9 – page 44r
Ystoria Carolo Magno: Can Rolant
44r
y gyffroi eu brenhin mor ayduet ac mor waho+
dus y orffowys ar y saỽl berigleu y dygant.
Rolond y hun heb y gỽenlyd yr hỽn a dycco
duỽ y agheu trỽy dial yssyd yn kyffroi y bren+
hin y hyny. Ac yn an gỽrthrymu ninheu heb
gorffowys o boyn a|llauur. Diwarnaỽt heb
ef yd oyd charlymayn yn eisted y dan gỽas+
caỽt pren godywyll a dyuot rolond attaỽ
wedy gỽiscaỽ y arueu ac ystynnu aual coch
idaỽ gan dywedut val hyn. drỽy yr aual
hỽn charlymayn heb ef yd anrydedaf i dy+
di o dyernassoyd* a choroneu yr holl vrenhi+
ned. ar holl vrenhinaytheu a darestygaf y
dan dy arglỽydiayth. Llawer a darestyg+
ỽys ynteu heb ef a llawer etwa a darestỽc.
yr yspayn hayach ry|darestygỽys. ac ody+
na yd a y estỽg babilon. Ryued yỽ a|dy+
wedy heb y blaccand o by|le y may rolond
y gobeith ar nerth kymeint ac yd adaỽ+
ho charlymayn darestỽg yr holl vrenhi+
ned. Y obeith yssyd yggleỽder y ffreinc
heb y gỽenwlyd y rei nyt llei a veidyant
noc a vedylyant. Ac nyt llei a allant
noc a ychwenychant. Ac nyt oys dim
yr y uchet y dan y nef ny chredynt hỽy
y vot y darystygedic udunt ac y eu ky+
dernyt. Paỽb o|r oes dim o|y vynnu ef
ny beidyoent hỽynteu a mynnu paỽb o+
nadunt hỽynteu yn yr eidaỽ ynteu yny
| « p 43v | p 44v » |