Breudwd Welsh Prose 1300-1425
Cymraeg

Cambridge Trinity College MS. O.7.1 – page 48v

Llyfr Blegywryd

48v

ac na bo llỽygus. Y neb a wertho
march llỽygus; atueret trayan y
werth yr prynỽr. Y neb a uarchocco
march dyn arall heb y ganhat. talet
yr perchen pedeir keinhaỽc eskyn
a phedeir diskyn. A phedeir dros pob
ran·tir y marchocco drostaỽ. a cham+
lỽrỽ yr brenhin. Pỽy bynhac a dif+
fero march rac lleidyr. pedeir kein+
haỽc a dyly y gan y perchen yg|kyf+
eir pob buch or a talei y march pei
gỽerthit. Y neb a uenffyccyo march
y arall hyt yn lle teruynedic. or a
hỽnnỽ a uo pellach ac ef. talet yr
perchen hanher yr ennill a gaffo
o uyỽn y hynny. Y neb a gymero
benffyc march. a llygru y gefyn hyny
dygỽytho y bleỽ yn hagyr. pedeir kein  ̷+
haỽc kyfreith a tal yr perchenhaỽc.
Or hỽyda hagen o atlo henllỽgyr a
thorri y croen hyt y kic. ỽyth keinhaỽc
kyfreith a|tal. Ony byd henllỽgyr
arnaỽ. A thorri croen a chic hyt ascỽrn
vn ar pymthec kyfreith a|tal.