Breudwd Welsh Prose 1300-1425
Cymraeg

Oxford Jesus College MS. 111 (The Red Book of Hergest) – page 271v

Amlyn ac Amig

271v

1087

bedydyaỽ an meibyon ni. a rodi dy uendith
udunt. drỽy gymryt y gennym ninheu a
vynnych o eur ac aryant dros dy lafur.
Ac y|r ymadrodyon hynny y gỽrtheba+
ỽd y pab udunt yn|y mod hỽnn. Ych rỽyd
ewyỻys chwi am gynnic ych da y mi yssyd
gymeredic y gennyf|i. aỽch da chỽitheu ha+
gen. ny|s mynnaf|i. o achaỽs nat reit ym
ỽrthaỽ. Y da a vynnasseỽch chwi y rodi y
mi. rodỽch y aghenogyon yr karyat duỽ.
y rei ysyd reit udunt ỽrthaỽ. a|r arch a
archassaỽch chỽitheu. honno a|geffwch.
Sef yỽ hynny bedydyaỽ aỽch meibyon. ac
y|dodes yn enỽ ar vab iarỻ aluern. amlyn
ac ar vab y marchaỽc o berigan. amẏc.
ac erchi y duỽ rodi rat ac yspryt udunt
y wassanaethu y duỽ yn gywir. yny ve+
ynt yn kaffel dros eu|gwassanaeth y
duỽ ỻewenyd teyrnas nef. A|r marchogy+
on pennaf o|wlat ruuein a|dalyssant
y meibyon ỽrth vedyd. A gỽedy y|r pab ve+
dydyaỽ eu meibyon rodi a|ỽnaeth y bob
vn onadunt ffiol o euruchweith odidaỽc
o eur ac o|aryant. a mein gỽerthuaỽr a|oed
ar y ffioỻeu. yn vn ỻiỽ ac yn vn veint ac yn
un eurychweith. ac nyt oed yn vyỽ yn dyn
a wypei wahan y·ryngthunt. rac eu|tebyc  ̷ ̷+
ket o|r a|e gỽelei ar neiỻtu. A dywedut a|w  ̷ ̷+
naeth eu tat ysprydaỽl ỽrthunt yn|y ffu+
ryf honn. Kymerỽch y rod honn arglỽy+
di veibyon y gan aỽch tat ysprydaỽl. yn
dystolyaeth tra voch vyỽ ar aỽch bedydy+
aỽ yn eglỽys pedyr yn ruuein. A gỽedy dar+
uot y|r gỽyrda kaffel eu negesseu yn rỽyd
ỽrth eu hewyỻys. diolỽch a|wnaethant y|r
pab y lavur a|e anregyon a|rodassei y eu
meibyon. a|thrỽy diruaỽr lewenyd y kych+
wynnassant parth ac eu|gỽlat. A gỽedy
kymryd mab y marchaỽc archderchaỽc*
o gasteỻ berigan. ef a|rodes duỽ idaỽ am  ̷+

1088

ylder o synhwyr a doethineb. a donyeu yn
erbyn y uot yn dengmlwyd ar|hugeint
ual y gelwit ef ympob gwlat yn eil selyf
o achaỽs y doethineb. Ac yn|yr amser hỽn+
nỽ y clefychaỽd y gỽr a|oed dat idaỽ o|r cle+
vyt y bu uarỽ. Ac yn|y wander kynn gỽ  ̷+
ahanu y eneit a|e gorff y gelwis y vab
attaỽ. Ac y kynghores yn|y wed honn. ar+
glwyd uab heb ef. ỻyma duỽ y|m dỽyn i at+
taỽ. ac y|th adaỽ ditheu heb dat knaỽtaỽl
ỽrth dy ewyỻys dy hun. wrth hynny ar+
glwyd vab heb ef kymer duỽ yn dat itt. ac
yn ỻywyaỽdyr arnat y gỽr ny byd marỽ
vyth. a|gỽna y gymenediỽeu a|chadỽ y
gynghoreu yn graff yn dy gallon. ac yn
diannot medylya beth a|dylyych y ga+
dỽ. Nyt amgen no|r dengeir dedyf. beth a dy  ̷ ̷+
lyych y ochel. Nyt amgen no phechaỽt.
beth a|dylyych y gredu. nyt amgen no|r
ffyd a|r gret y mae yr eglỽys gatholic
yn|y dangos y|r gristonogaeth. Nyt am+
gen yỽ hynny no bot vn duỽ hoỻ gyfoe+
thaỽc. a bot teir person y tat a r mab a|r
yspryt glan. a geni iessu o veir wyry
kynn esgor. a gỽedy esgor. a chyuodi
Jessu grist o veirỽ. ac esgynnv ohonaỽ
ar nefoed. a|e dyuot y uarnu dydbraỽt
ar vyỽ ac ar|veirỽ. Medylyaỽ heuyt a
dylyy beth a dylyych y obeithaỽ. Nyt
amgen noc am|lewenyd teyrnas nef drỽy
weithredoed da o|th blegyt dy|hun. ac o
rat yr iessu grist drỽy rym y diodeifyeint
ar y groc. Car duỽ a|th gymodogyon. a
pha|beth bynnac a|wnelych. nac a|dywet+
tych nac a vedylyych medylya am dy
angeu. kanys hynny a|eirch yr ysgrythur
lan. yr honn a|dyweit drỽy eneu selyf
uab dauyd. Medylya am y pyngkeu di+
wethaf ac yn dragywydaỽl ny phechy.
Nyt amgen yỽ hynny no phan|del ang+
heu