Breudwd Welsh Prose 1300-1425
Cymraeg

Oxford Jesus College MS. 111 (The Red Book of Hergest) – page 282v

Gramadeg y Penceirddiaid

282v

1131

Nyt digeryd duw neut digarat kerd. neut
ỻei gwyrd y vyrd o veird yn rat. neut|ỻiaws
vrwyn kwyn kanwlat yg|kystud o|th attal
ruffud waewrud rodyat. a|e chynnal veỻy
hyt y penn. Gwaewdodin a vyd o deu
benniỻ vyrryon. o naỽ siỻaf pob un o·nad+
unt. a|phenniỻ hir o|bedeir siỻaf ar bym+
thec. val y mae yr|awdyl honn ~  
Daroganaf naf daroganant. darogan+
ueird heird. digeird dygant. dognoed o
wiscoed a|wisgant. o|e law|daryf|loeguraỽ*.
kanỻaỽ kynỻuc rymyant. ~  
Kyhyded hir a|uyd o benniỻeu hiryon oỻ.
o bedeir siỻaf ar bymthec pop un ohonunt.
Ac yn|y penniỻ hỽnnỽ y|byd tri phenniỻ
byrryon. deu o pump siỻaf pob un ohonunt.
a|phob un ohonunt yn atteb y gilyd. A
phenniỻ araỻ o naỽ siỻaf. Ac yn|y bymhet
siỻaf yn atteb y|r|deu benniỻ gyntaf.
Ac ỽrth diwedawdyl y penniỻ hỽnnỽ y
kynhelir yr aỽdyl oỻ. val y mae honn.
Llauaru a|wnaf ỻywyaỽdyr nef a|e naf.
ỻyỽ nerth y galwaf. gelỽyd aruer. 
ỻyna vy namwein. ỻym voli riein. ỻarye+
id bryt mirein. ỻun mein muner. 
Kyhyded verr a|vyd. o benniỻeu byryon
oỻ. o wyth siỻaf pob ohonunt. val y mae hon.
Gwan wyf o glỽyf yn glaf. trymheint.
gỽenn|ffraeth a|m gỽnaeth gne goueile+
int. gỽennyeith yỽ gỽeith y gỽythlaỽn
deint. gwynder ỻeuer ỻoer am|blygeint.
Rupynt a|vyd o|benniỻeu byrryon oỻ.
o deudec siỻaf pob un ohonunt. Ac yn|y
penniỻ hỽnnỽ y|byd tri|phenniỻ byrryon.
o bedeir siỻaf bob vn o·nadunt. a|r deu
gyntaf yn atteb pob un y|gilyd. ac ỽrth
diwedawdyl y penniỻ diwethaf y kynn+
helir yr awdyl oỻ. a|r eil siỻaf o|r try+
dyd penniỻ yn atteb y|r deu benniỻ
ereiỻ. val y mae honn. Trindaỽt

1132

ffawt ffer tref nef niuer. gwarder gỽir+
dat. trech wyt no neb. trỽy dawn atteb.
treidỽn attat ~
Gwedy hynny y dechymygwyt pedwar
messur ereiỻ. Nyt amgen. byrr a thode+
it. a gwaydodin* hir. a chyhyded naỽbann.
a|chlogyrnach. Byrr a|thodeit a uyd o
benniỻ hir yn gyntaf. o vn siỻaf ar|bymth+
ec. megys dryỻ eglyn vnawdyl. ac odyna
kymeint ac a|vynner o|benniỻeu byrryon o
wyth siỻaf bob vn onadunt. Ac odyna pen+
niỻ hir o vn siỻaf ar|bymthec. megys y
kyntaf. a|e chynnal ueỻy hyt y penn.
val y mae yr aỽdyl honn. 
Y gỽr a|m rodes rinyeu. ar|dafaỽt. ac|ar
waỽt ac eiryeu. a|m trosses y gyffes nyt
geu. a|m trosso y|r trossed goreu. y guryaỽ
gorwisc vyg|grudyeu. y garu mab duỽ diam+
eu. y gymryt penyt rac poeneu. vffern ac
affeith bechodev. ~
Gwaeỽdodin|hir a|uyd o|benniỻeu byrryon.
o naỽ siỻaf bob un ohonunt. a|phenniỻ hir
o|bedeir siỻaf ar|bymthec. vn ffuryf a|gỽaeỽ+
dodin araỻ. eithyr bot o benniỻeu|byrryon
yndaỽ kymeint ky ac a|uynner. val y mae
Gwan yaỽn ỽyf o glỽyf yr [ honn.
gloyỽ uorwyn. gỽae a|uaeth hiraeth brif ar+
uaeth brwyn. gỽyr vyg|kallon donn defnyd
vyg|kỽyn. gỽnn ar vyrr y tyrr kynn|bo terỽ+
yn. am|na|daỽ y laỽ y|lwyn. a bỽyỻaf. arraf
a|garaf attaf atteb adfwyn ~  
Kyhyded naỽ·ban a|vyd o benniỻeu byrryon
oỻ. o naỽ siỻaf pob un ohonunt. val y|mae|honn.
Wrthyt greaỽdyr byt bit vyg|gobeith.
wrthyf byd hywar drugar hywar hyweith.
yr|th argae neut gwae nyt gỽael y gỽeith.
y|th|archaf dangnef keinỻef kannỻeith.
wrth hynny duỽ vry urenhin pob ieith.
wrth dynyon gỽylon y bo goleith. A|e
chynnal ueỻy hyt y penn. ~