NLW MS. Peniarth 4 (The White Book of Rhydderch, part 2) – page 34v
Peredur
34v
135
ar hẏnnẏ kẏfodi a|wnaeth ẏ vor ̷+
ỽẏn ẏ vẏnẏd ẏdan ellỽg ẏ|dagreu
a dẏfot racdi ẏ|r ẏstauell. a|chan tỽrỽf
ẏ dor ẏn agori. deffroi a|oruc peredur. ̷
ac ẏd oed ẏ uorỽẏn a|e dagreu ar|hẏt
ẏ grudẏeu ẏn redec. Dẏwet vẏ chwa ̷+
er heb·ẏ peredur. pẏ ỽẏlaỽ ẏssẏd arnat ti.
dẏwedaf it arglỽẏd heb hi. vẏn tat|i
bieoed ẏ llẏs hon. a|r iarllaeth oreu
ẏn ẏ bẏt ẏdanei. Sef ẏd oed mab
iarll arall ẏ|m erchi inheu ẏ|m tat.
Nẏt aỽn inheu o|m bod idaỽ ef. nẏ
rodei vẏn tat inheu o|m hanuod nac
idaỽ nac ẏ neb. ac nẏt oed o|plant
ẏ|m tat namẏn mi|hun. a gỽedẏ ma ̷ ̷+
rỽ vẏn tat; ẏ|dẏgỽẏdỽẏs ẏ kẏfoeth
ẏ|m llaỽ inheu. hỽẏrach ẏ mẏnnỽn
i efo ẏna no chẏnt. Sef a|oruc ẏnteu
rẏfelu arnaf|i a|gorescẏn vẏg kẏfoeth
namẏn ẏr vn tẏ hỽnn. a rac dahed ẏ
gỽẏr a|welesit|i brodẏr maeth imi. a ̷
chadarnhet ẏ tẏ. nẏ cheit bẏth arnam
tra barahei uỽẏt a|llẏn. a hẏnnẏ rẏ|de ̷+
rẏỽ. namẏn mal ẏd oed ẏ manachesseu
a weleist|i ẏn an porthi herwẏd bot ẏn
rẏd udunt ỽẏ ẏ|wlat a|r kẏfoeth. ac
weithon nẏt oes udunt ỽẏnteu na bỽẏt
na llẏn. ac nẏt oes oet bellach auorẏ
ẏnẏ del ẏr iarll a|e holl allu am pen ẏ
lle hỽn. ac os miui a geif ef. nẏ bẏd
gỽell vẏn dihenẏd no|m rodi ẏ|weisson
ẏ veirch. a|dẏuot ẏ ẏmgẏnnic i|ttitheu
arglỽẏd ẏn|ẏ|wed ẏ|bo hẏgar genhẏt
ẏr bot ẏn nerth in ẏn dỽẏn odẏma
neu ẏ|an hamdiffẏn ninheu ẏma.
Dos vẏ chwaer heb ef ẏ gẏscu. ac
136
nẏt af ẏ ỽrthẏt heb vn o hẏnnẏ. Tra ̷+
chefẏn ẏ doeth ẏ vorỽẏn ac ẏd aeth
ẏ gẏscu. Trannoeth ẏ bore kẏfodi a|w ̷+
naeth ẏ vorỽẏn a dẏuot ẏn ẏd oed pe ̷+
redur a chẏfarch gỽell idaỽ. Duỽ a ̷
rodo da it eneit. a|chwedleu genhẏt.
nac oes namẏn da arglỽẏd tra vẏch
iach ti. a bot ẏr iarll a|e holl allu gỽedẏ|r
disgẏnnu ỽrth ẏ tẏ. ac nẏ welas neb
lle amlach pebẏll na marchaỽc ẏn
galỽ am arall ẏ ẏmwan. Je heb·ẏ ̷
peredur. kẏweirher i|minheu vẏ march.
a|mi a gẏfodaf. Y varch a gẏỽeirỽẏt
idaỽ. ac ẏnteu o gẏfodes ac a|gẏrchỽẏs
ẏ|weirglaỽd. a|phan daỽ ẏd oed mar ̷+
chaỽc ẏn marchogaeth ẏ varch a
gỽedẏ dẏrchafel arỽẏd ẏmwan. ̷
Peredur a|e bẏrẏaỽd dros pedrein ẏ
varch ẏ|r llaỽr. a|llawer a uẏrẏỽẏs
ẏ dẏd hỽnnỽ. a|phrẏt naỽn parth
a|diwed ẏ|dẏd. ef a doeth marchaỽc
arbennic ẏ ẏmwan idaỽ. a bỽrỽ
hỽnnỽ a|oruc. naỽd a erchis hỽnnỽ.
pỽẏ ỽẏt titheu heb·ẏ peredur. Dioer
heb ef penteulu ẏr iarll. beth ẏs ̷+
sẏd o gẏfoeth ẏ iarlles ẏ|th vedẏant
ti. Dioer heb ef ẏ traẏan. Je heb ef
atuer idi traẏan ẏ chẏfoeth ẏn llỽẏr
ac a|gefeist o|da o·honaỽ ẏn llỽẏr. a|bỽẏt
can hỽr ac eu llẏn. ac eu meirch ac
eu harueu heno ẏn ẏ|llẏs idi. a thi ̷+
theu ẏn garcharaỽr idi. eithẏr na
bẏch eneituadeu. hẏnnẏ a|gahat
ẏn diannot. ẏ vorỽẏn ẏn hẏfrẏt la ̷ ̷+
wen ẏ nos honno traẏan ẏ chẏfoeth
ẏn eidi. ac amẏlder o veirch ac arueu.
| « p 34r | p 35r » |