Breudwd Welsh Prose 1300-1425
Cymraeg

NLW MS. Peniarth 19 – page 37v

Brut y Brenhinoedd

37v

147

A  Gỽedy kaffel o gaswaỻa+
ỽn yr eil uudugolyaeth
ymlenwi a|wnaeth o diruaỽr
lewenyd. a gossot gỽys dros
wyneb ynys brydein y erchi
y baỽp o|r Jeirỻ a|r barỽneit
a|r marchogyon urdolyon dy+
uot ỽynt ac eu gwraged hyt
yn ỻundein y wneuthur a*+
beth ac y dalu dylyedus an+
ryded a molyant y eu tado+
lyon dỽyweu drỽy y rei y kaỽs+
synt y vudugolyaeth dwy+
weith ar amheraỽdyr ruuein
ac y wneuthur gỽylua enry+
dedus udunt. A gỽedy dyuot
paỽb hyt yn ỻundein ỽrth y
dyuyn hỽnnỽ. pob kyfryỽ a+
niueileit a|ducpỽyt yno ỽrth
eu haberthu ual yd oed deuaỽt
yn|yr amser hỽnnỽ. Ac yna y
ỻas ugein mil o warthec. a chan
mil o deueit. ac o amryỽ genedyl
adar y saỽl ny eỻit rif arnunt.
a|deg|mil ar|hugeint o amryỽ
genedloed bỽystuileit gỽyỻt.
A gỽedy daruot talu teilỽg an+
ryded y|r|dwyỽeu herỽyd eu de+
uaỽt ỽynt a|wnaethant wledeu
o|r dryỻ araỻ. A gỽedy daruot
treulaỽ ỻawer o|r dyd yn|y wed
honno. y dryỻ araỻ o|r dyd a|r
nos. a dreulỽyt drỽy amryuae+
lyon gerdeu a|didanỽch a gỽa+
ryeu megys y dewissei baỽp

148

Ac yn|y gỽaryeu hynny y dam+
chweinyaỽd y deu was Jeuangk
arderchaỽc. nei y|r brenhin. a nei
y auarỽy uab ỻud tywyssaỽc
ỻundein. tyfu amrysson y·ryg+
thunt yn bỽrỽ paelet. Sef oed
nei y brenhin hireglas. a nei
avarỽy oed guelyn. A gỽedy
ymgeinyaỽ o·honunt. sef a|oruc
kuelyn displeynyaỽ* cledyf a
chyrchu hireglas nei y brenhin
a ỻad y benn. a chynnỽryf maỽr
a gyuodes yn|y ỻys. a|r chwedyl
a doeth att gasswaỻaỽn. a ỻidiaỽ
a|wnaeth am lad y nei. ac erchi
a oruc y auarỽy uab ỻud dỽyn
y nei y diodef braỽt ỻys ar+
naỽ am y gyflauan a|wnatho+
ed. A gỽedy gỽelet o auarỽy
bryt y brenhin yn gyffroedic
am lad y nei ac yn ỻidyaỽc.
gỽrtheb a|oruc auarỽy idaỽ
ual hynn gan betrussyaỽ roi
y nei ỽrth ewyỻys y brenhin.
Dioer heb ef ỻys yssyd y min+
neu. ac y|m ỻys i y dyly vyg
gỽr i atteb o bop peth o|r a yr+
rer arnaỽ. ac os holi kuelyn
a|vynn. dywetut yd|ỽyf|i. mae
yn ỻundein y dyly gỽneuthur
iaỽn. kanys y ỻys honno oed
hynaf a phennaf yn ynys
brydein yr y dechreu. ac ynteu
auarỽy yn|y eidaỽ ef honno.
ac ynteu a|wnaei iaỽn yno