NLW MS. Peniarth 5 (The White Book of Rhydderch, part 1) – page 120r
Ystoria Bown de Hamtwn
120r
243
y|dywaỽt ỽrthi. a|oes dim
a|allo gỽaret it ac* o byd na ̷ ̷
chel yr a gosto; oes arglỽyd
heb hi pei kaỽn beth o gic y
baed coet yn ir mi a|gaỽn
iechyt. a|ỽdost ti pa le y keit
kyuot ar vaed coet. gỽn ar ̷ ̷+
glỽyd heb hi yn yn fforest ni
vch penn y mor y mae baed
coet medei y fforeswyr ymi.
a minneu a|af auory yno yn
vore. Sef a|wnaeth hitheu
yna kyuodi yn|y|seuyll a|dodi
y|dỽylaỽ am y vynỽgyl. a ro ̷ ̷+
di kussan ydaỽ. a|thrannoeth
y|gỽiscaỽd y iarll ymdanaỽ ac
y kymerth y daryan a|y wayỽ
a|e gledyf heb arueu yn ang ̷ ̷+
chỽanec ac ar y petwyryd mar ̷ ̷+
chaỽc yd aethant tu a|r fforest.
a ffan yttoedynt yn y fforest
yn keissaỽ y baed y kyuodes
yr amheraỽdyr o|e llechua ac
y|dywaỽt ỽrth y iarll y* vchel
dyret hen|gleirych ragot mi
a|ladaf dy benn ac a baraf crogi
boỽn dy vab a|th wreic a|gyme ̷ ̷+
raf y minneu. ac yna y|dywa ̷ ̷+
ỽt y iarll y|ghorf i a rodaf yn
erbyn dy gorff ti y amdiffin
vy|gwreic a|m mab a|ffe|bei gyt
a|mi luossogrỽyd o gedernyt
yscaelus a|beth oed gennyf
dy|uygỽth. ac os vy llad a|deruyd
244
ym. yn dibechaỽt y|m lledir.
ac yn y|drindaỽt y dodaf vy
ymdiret. ac yna ymgyrchu a
wnaethant a|r iarll a uyryỽyt
y|r llaỽr. Yna y dywaỽt ef hen
ỽr ỽyf vi a|thitheu gỽr ieuanc
ỽyt. ac yna kyuodi yn|y seuyll
a wnaeth a|thunnu* y gledyf
megys gỽr deỽr ac ymlad yn
vychyr a|r amheraỽdyr. ac ar
hynny y kyuodes petwar ̷ ̷
cant marchaỽc y vynyd a|e
gyrchu a|e vrathu degmrath
a llad y dri chedymdeith. a ffei
bei aruaỽc ỽrth y ewyllus ef
a|diaghei hyt yn hamtỽn.
a gỽedy y oruot ef dygỽydyaỽ
a|wnaeth ar benn y lin rac bronn
yr amheraỽdyr ac erchi tru ̷ ̷+
gared idaỽ ac ystynnu y|gle ̷ ̷+
dyf idaỽ a chynnic y holl gyfo ̷ ̷+
eth idaỽ dieithyr y wreic a|e
vab yr na ledit. na|uynnaf
yrof a duỽ heb ef a|chyuot y
uynyd a|wnaeth yr amheraỽ ̷ ̷+
dyr a thynnu chedyf* a llad
penn giỽn iarll. ac yn diannot
y anuon yn anrec y|r iarlles
a hitheu a uu leỽen ỽrth yr
anrec ac a dyỽot ỽrth y gennat
kymmer varch a ffrysta yn er ̷ ̷+
byn yr amheraỽdyr ac arch
idaỽ dyuot racdaỽ yn llawen.
ac avory ni a|wnaỽn yn priodas
| « p 119v | p 120v » |