Oxford Jesus College MS. 111 (The Red Book of Hergest) – page 72v
Brut y Tywysogion
72v
287
y tyỽyssaỽc. Eissoes ef a|e|drychafaỽd
deissyfyt lewenyd drỽy racweledigaeth
duỽ. kanys yd oed neb·un gasteỻ a|elw+
it y rỽyd gruc. y buessit yn vynych
yn ymlad ac ef heb dygyaỽ. a phan
doeth gỽyrda owein a|e deulu y ymlad
ac ef. ny aỻaỽd nac anyan y ỻe na|e
gedernit ymỽrthlad ac ỽynt yny los+
get y casteỻ ac yny diffeithỽyt. gỽedy
ỻad rei o|r kasteỻwyr a|dala ereiỻ a|e
karcharu. a ph·an gigleu owein
yn tywyssaỽc ni hynny y geỻygỽyt
ef y gan bob dolur. a|phob medỽl cỽ+
ynuanus. ac y|doeth yn rymus y|r
ansaỽd a|oed arnaỽ gynt. y vlỽydyn
rac ỽyneb yd aeth lowys urenhin
freinc. ac amheraỽdyr yr almaen
gyt ac ef. a diruaỽr luossogrỽyd o
ieirỻ a barỽneit a thywyssogyon
gyt ac ỽynt a chroes y gaerussalem
Y vlỽydyn honno y kyffroes cadeỻ
ab gruffud a|e|urodyr. Maredud. a
rys. a gỽilim ab geralt a|e urodyr
gyt ac ỽynt lu am|benn casteỻ gỽiss
a gỽedy annobeithaỽ o·nadunt yn|y
nerthoed e|hunein. Galỽ howel ab
owein a|orugant yn|borth udunt.
kanys gobeithaỽ yd|oedynt o|e deỽr+
leỽ luossogrỽyd ef parottaf y ym+
ladeu a|e doethaf gyghor gaffel o+
nadunt y uudugolyaeth. a howel
megys yd|oed chwannaỽc yn was+
tat y glot a|gogonyant a|beris
kynuỻaỽ ỻu gleỽaf a|pharottaf
yn enryded y harglỽyd. kymryt
hynt a|oruc tu a|r dywededic gasteỻ
a|gỽedy y|aruoỻ yn enrydedus o|r
dyỽededigyon uarỽneit yno peby ̷+
ỻyaỽ a|ỽnaeth. a|hoỻ negesseu y
ryfel a|ỽneit o|e gygor ef a|e dechym+
mic. ac ueỻy yd oed baỽb o|r a|oed
yno y oruchel ogonyant a budugo+
lyaeth drỽy oruot ar y casteỻ o|e gyg ̷+
hor ef gan diruaỽr ymrysson ac
ymlad. ac odyno yd ymchoelaỽd
howel yn uudugaỽl drachefyn. ny
288
bu beỻ gỽedy hynny y bu teruysc y+
rỽg howel a chynan veibon owein a
ch·adwaladyr. ac odyna y deuth howel
o|r neiỻ tu. a chynan o|r tu araỻ hyt ym
meironnyd a|e galỽ a|ỽnaethant y laỽ
gỽyr y wlat a|gilyassant y noduaeu e+
glỽysseu gan gadỽ ac ỽynt y noduaeu
ac enryded yr eglỽys. Ac odyna kyw+
eiryaỽ eu bydin a|wnaethant tu a|chyn+
uael casteỻ cadwaladyr yr hỽnn a|w+
nathoed katwaladyr kyn|no hynny y+
n|y ỻe yd oed moruran abat y ty gỽyn
yn ystiỽert. yr hỽnn a ỽrthodes rodi
y ỽrogaeth udunt. kyt ys|profit weith+
eu drỽy arỽydon vegythyeu. gỽeitheu
ereiỻ drỽy anneiryf anregyon a rody+
on a|gynigyit idaỽ. Kanys gỽeỻ oed
gantaỽ uarỽ yn aduỽyn. no dỽyn y
vuched yn|dỽyỻodrus. a phan welas
howel a chynan hynny. dỽyn kyrch
kynhyruus y|r kasteỻ a|ỽnaethant.
a|e enniỻ a|orugant y dreis. ac o vre+
id y diegis ceitweit y casteỻ. drỽy nerth
y kyfeiỻon wedy ỻad rei o|e kedymdei+
thon. a brathu ereiỻ. Yn|y vlỽydyn
honno y bu uarỽ robert Jarỻ uab
henri. gỽr a|gynhalassei ryfel yn er+
byn esteuyn urenhin deudeg|mlyned
kyn no hynny. Y vlỽydyn honno y bu
uarỽ gilbert iarỻ. Y vlỽydyn rac ỽy+
neb y bu uarỽ vchtrut escob ỻan daf
gỽr maỽr y volyant. ac amdiffynnỽr
yr eglỽysseu. gỽrthỽynebỽr y elyny+
on yn|y berfeith heneint. ac yn|y ol
ynteu y bu escob ni·col uab gỽr·gant
Ẏn|y vlỽydyn honno y bu uarỽ ber+
nart escob mynyỽ. yn|y dryded vlỽy+
dyn ar|dec ar|hugeint o|e escobaỽt. gỽr
enryfed y volyant. a|dyỽaỽlder a san+
teidrỽyd oed. wedy diruaỽryon la+
furyeu ar vor a thir. ỽrth beri y
eglỽys vynyỽ y hen rydit. ac yn|y
ol ynteu y dynessaaỽd yn escob da+
uyd uab gerald archdiagaỽn ke+
redigyaỽn. Yn|y vlỽydyn honno y
bu uarỽ robert escob henford gỽr o+
| « p 72r | p 73r » |