Breudwd Welsh Prose 1300-1425
Cymraeg

NLW MS. Peniarth 19 – page 81r

Brut y Brenhinoedd

81r

369

y gyrchu a|e geissyaỽ kynn kael
y|fonn. Ac nyt oed lesc ynteu
kanys neur gathoed y fonn.
a|tharaỽ arthur o|e hoỻ ynni
ar y|daryan a|oruc. yny glyỽit
sein y dyrnaỽt ym|pedryfan
yr awyr. a|r hoỻ draetheu yn
ỻaỽn o son. a|chlusteu arthur
gỽedy ry bylu a bydaru gan
dỽrd y dyrnaỽt. Ac ỽrth hynny
ennynnu a|oruc arthur o wychraf
Jrỻoned ac ymdrychafel. ac yn
y|dal rodi dyrnaỽt y|r kaỽr. a
chynny bei agheuaỽl. Eissyoes
y gỽaet yn redec ar hyt y wy+
neb a|e lygeit a|bylỽys y drein.
kanys y kaỽr a|dodassei y fonn
y·rỽng y dal a|r dyrnaỽt. a hyn+
ny a|e diffeith rac dyrnaỽt ag+
heuaỽl. ac ỽrth hynny ỻidyoc+
ach vu y kaỽr. ac megys baed
coet ar hyt yr aỽch·waeỽ yn kyr+
chu yr helywr. veỻy ar|hyt y
gledyf kyrchu arthur a|oruc.
ac ymauael yndaỽ am y wre+
gys. a|e drauodi yny vyd ar
benn y lin y|r ỻaỽr. ac yn|y ỻe
galỽ a|oruc arthur y nertho+
ed attaỽ a ỻithraỽ o|e dỽylaỽ.
ac o bop parth idaỽ fustaỽ yr
aghenuil hỽnnỽ a|r|cledyf yny
gafas agheuaỽl dyrnaỽt a|r
cledyf yn|y benn hyt yr|emennyd.
ac yna diaspast a|dodes y kaỽr.
ac megys derwen a|diwreidei

370

y gỽynt syrthyaỽ gan diruaỽr
dỽryf a|oruc. a|chwerthin a oruc
arthur. ac erchi ỻad y benn
o vedwyr. a|e rodi ar vn o|r gỽ+
eissyon y dỽyn y blith y ỻu
y dangos yn ryuedaỽt. Ac
ueỻy y gỽnaethpỽyt. Ac yna
y dywaỽt arthur na ry gaỽs+
sei eiryoet yr eil gỽr kyn|deỽ+
ret a hỽnnỽ. dyeithyr Ricka
gaỽr a ymladyssei ac ef ac a
ladyssei yn eryri. a|hỽnnỽ a
wnathoed idaỽ pilis o varneu
brenhined a ry ladyssei. ac an+
uon a|oruc att arthur y erchi
idaỽ blingaỽ y varyf e|hun
a|e hanuon idaỽ ef. ac megys
yd oed arthur yn|bennaf ar
y brenhined. ynteu a|dodei y
varyf ef yn vchaf ar y pilis
o|r barueu ereiỻ oỻ yn enry+
ded y arthur. ac ony wnelei
ef hynny. erchi y arthur
dyuot y ymlad ac ef. a|r
trechaf o·honunt kymerei
bilis a baryf y ỻaỻ. A gỽedy
eu mynet y ymlad y kafas
arthur y vudugolyaeth ac y
kymerth varyf y kaỽr a|e
bilis. A gỽedy hỽnnỽ ef a
dywedei na chyhyrdassei ac
ef eiryoet yr eil gỽr kyn|dew+
ret a|r ỻaỻ. A gỽedy kaffel o
arthur y vudugolyaeth hon+
no yn|yr eil wylua o|r nos ỽynt