NLW MS. Peniarth 19 – page 98r
Brut y Brenhinoedd
98r
437
namyn kyfoeth y goruchel
urenhin yr hwnn ny pheidyas+
sam ni yn|y godi yn wastat
a chan y ryw gwynvan honno y
deuth ef y draeth llydaỽ Ac od+
yna gyt a|e gynuỻeitua y
deuth hyt ar alan vrenhin
llydaw nei y selyf a hỽnnỽ a|e
haruolles yn enrydedus. Ac
uelly y bu ynys brydein vn
vlwydyn ar dec yn diffeith o|e
chiwdawtwyr dyeithyr ychydic
yn ymyleu kymry a|diaghei
a arbedassei agheu udunt
o|r dyual newyn A heuyt hyt
hynny o yspeit y buassei y
tymhestyl a|r aball ar y saes+
on heb orffowys a|r rei a|diang+
yssei o|r aruthyr pla honno
o|r saeson gan gadw peu gnota+
edic defawt wynt a anuonassant at
eu kiwtawtwyr y germania y
venegi udunt bot ynys pry+
dein yn diffeith heb neb yn|y chyv+
anhedu a|bot yn haỽd udunt
dyuot idi o|e goresgyn o|r myn+
nynt y phressỽylaỽ. ac ual y
clywsant wynteu hynny bren+
hines vonhedic a|elwit sexbur+
gis a gỽedỽ oed honno a honno
a gynullaỽd aneirif o|amylder
gynulleitua o wyr a|gwraged
438
ac a deuth y|r alban y|r tir a|r
gwladoed diffeith heb neb·ryw
presswylder yndunt o hynny
hyt gernyw wynt a|e kymerass+
ant heb neb a|e gwarafunei
udunt kanyt oed neb yn|y
phressỽylaỽ dyeithyr ychydic
wediỻon y|myỽn koetyd kym+
ry a|e differei ac o|r amser hỽn+
nỽ aỻan y kollassant y bryta+
nyeit eu ỻywodraeth ar ynys
brydein. ac y dechreuaỽs y saes+
son y gỽledychu. Ac yna gỽe+
dy ỻithraỽ rynnaỽd o amser
heibyaỽ ac ymgadarnhav
o|r racdywedigyon bobyl
honno yna koffau a|oruc kad+
walaỽdyr y teyrnas gỽedy
peidyaỽ o|r abaỻ a|r trueni a
ry vuassei yndi vn vlỽydyn ar
dec. dyuot a|oruc hyt att alan
y adolỽyn porth idaỽ y geissaw kynyd+
u y gyuoeth drachefyn A gỽedy
adaỽ o alan idaỽ borth hyt
tra yttoed yn paratoi llyges
ef a|doeth egylyaỽl lef y|gan duw
y erchi idaỽ peidaỽ a|e darpar
am ynys brydein kany mynnei
duỽ gỽledychu o|r brytan+
yeit yn|yr ynys a vei hỽy hyt pan
delei yr amser tyghetuennaỽl
a broffỽydassei vyrdin ac ygyt
| « p 97v | p 98v » |