NLW MS. Peniarth 19 – page 114r
Brut y Tywysogion
114r
501
y lettyaỽ heb wneuthur dim
drỽc amgen. Ac ual yd oedynt
yn|dỽyn eu hynt. nachaf wyr
meiryonnyd y|ghyfrỽg mynyd+
ed ac ynyalỽch yn ỻywyaỽ eu
bydin gỽewyr ac yn kyfaruot
ac ỽynt ac yn eu ruthraỽ; ac
yn|dodi gaỽr arnadunt. Ac ỽyn+
teu heb dybyaỽ dim ỽrthunt
ar y kyrch kyntaf y ffoassant.
Ac yna y doeth owein. a phan y
gỽeles gỽyr meiryonnyd ef yn
kyrchu yn kyrchu yn wraỽl. ac
yn baraỽt y ymlad. fo yn deissyf+
yt a|orugant. ac ỽynteu a|e hym+
lidyassant ỽy hyt eu gỽlat. a di+
feithyaỽ y ỽlat a|wnaethant. a
ỻosgi y tei a|r ydeu. a ỻad yr
ysgrybyl kymeint ac a gaỽsant
heb dỽyn dim ganthunt. a gỽe+
dy hynny yd|aeth madaỽc y
bowys. ac owein a ymchoelaỽd
ef a|e wyr y geredigyaỽn y ỻe.
yd|oed y|dat yn gỽledychu ac
yn pressỽylaỽ. a thrigyaỽ a|oruc
ef a|e gedymdeithyon yn|y ỻe
y mynnaỽd. a choffau dyuot+
yat y dat kynno hynny y|r ky+
uoeth. kanys y gedymdeithyon
a|athoedynt y dyuet y yspeilaỽ
y wlat ac y|daly y dynyon ac
eu dỽyn yn rỽym y|r ỻogeu a
dathoedynt gan owein o Jwer+
502
don. Ac yna yd oedynt yn|tri+
gyaỽ yn|teruyneu y wlat. ac
eilweith yd aethant a galỽ yn+
uydyon y achwaneckau eu
rif. a chyrchu dros nos y
wlat a|e ỻosgi. a ỻad paỽb o|r
a|gaỽssant yndi. ac yspeilaỽ
ereiỻ. a dỽyn ereiỻ ganthunt
yg|karchar. a|e gỽerthu y eu
kenedyl. neu eu hanuon yn
rỽym y|r ỻogeu. A gỽedy ỻosgi
y tei. a ỻad kymeint ac a gaỽ+
sant o aniueileit. a|chyme+
int ac a aỻyssant a dugant
ganthunt. ỽynt a ymchoel+
assant y|geredigyaỽn. ỽrth
letyaỽ a mynet a|dyuot. heb
edrych dim o|achỽysson cadỽ+
gaỽn. nac o wahard y brenhin.
A rei ohonunt dreigylgỽeith
a|oedynt yn kadỽ fford y deuei
henafgỽr o|r flemyssyeit a|el+
wit wilyam o vrebam. ac ỽynt
a|e kyferbynassant ac a|e ỻad+
assant. ac yna mynet a|oruc
kadỽgaỽn a Jorwerth y lys
y brenhin ar vedỽl ymdidan
ac ef. ac ual yd|oedynt yno.
nachaf braỽt y|r gỽr a|ladys+
sit yn|y ỻe yn menegi y|r
brenhin ry lad o owein a|e
gedymdeithyon y vraỽt. A
phan gigleu y brenhin hynny
| « p 113v | p 114v » |