NLW MS. Peniarth 19 – page 116v
Brut y Tywysogion
116v
511
dyuot y hedỽch y brenhin.
ac adaỽ ỻawer idaỽ a|e dỽyỻ+
aỽ y|gyttunaỽ ac ỽynt. ac
ny chytsynnyaỽd owein a hyn+
ny. ac yn|y ỻe nachaf vn yn
dyuot attaỽ ac yn dywedut
ỽrthaỽ. Byd oualus. a|gỽna
yn gaỻ yr hynn a|wnelych.
ỻyma ruffud ac owein y vab
gỽedy kymryt hedỽch gan
uab y moel cỽlỽm a|r Jarỻ.
gỽedy rodi idaỽ ohonunt y
dir yn ryd. heb na threth na
chyỻit na chasteỻ yndaỽ hyt
tra vo byỽ y brenhin. ac etto
ny chytsynyaỽd owein a hyn+
ny. Ac eilweith yd aruaethaỽd
y brenhin anuon kennadeu
att owein. ac ygyt ac ỽynt
maredud uab bledyn y ewy+
thyr. yr hỽn pan weles owein
a|dywaỽt ỽrthaỽ. Edrych di
na hỽyrheych dyuot att y
brenhin rac racvlaenu o
ereiỻ a chael y gedymdeithy+
as. ac yna owein a doeth att
y brenhin. a|r brenhin a|e har+
uoỻes yn ỻawen drỽy vaỽr
garyat ac enryded. ac y dyỽ+
aỽt ỽrthaỽ. Kan doethost di
attaf|i o|th vod a chan credeist
vyg|kenadeu. Minneu a|th va+
512
ỽrhaaf di. ac a|th ardrychafaf
yn vchaf yn vchaf ac yn ben+
naf o|th genedyl. a mi a|e|talaf
ytt yn|gymeint ac y kynghor
paỽp o|th genedyl ỽrthyt. a mi
a rodaf ytt dy hoỻ tir yn ryd.
A|phan gigleu gruffud hynny
anuon kenadeu a|oruc att y
brenhin y geissyaỽ hedỽch y
ganthaỽ. a|r brenhin a|e kyme+
rth ef y hedỽch gan dalu
treth vaỽr idaỽ bop blỽydyn.
ac ymchoelut a|oruc y brenhin
y loegyr. ac erchi y|owein dy+
uot ygyt ac ef. a dywedut y
talei idaỽ a vei gyfyaỽn. a dy+
wedut ỽrthaỽ. hynn a|dywedaf|i
ytti. Myui a af y normandi.
ac ot deuy di ygyt a mi. min+
neu a|gywiraf ytti bop peth
o|r a edeweis ytt. a mi a|th wnaf
yn varchaỽc urdaỽl. a chan+
lyn y brenhin a|wnaeth drỽy
y mor. ac ynteu a gywiraỽd
idaỽ pob peth o|r a|edewis. Y
vlỽydyn rac·wyneb yd ymcho+
elaỽd y brenhin o normandi.
ac owein vab kadỽgaỽn gyt
ac ef. ac y bu varỽ Jeffrei es ̷+
cob mynyỽ. ac yn|y ol ynteu
y doeth gỽr o normandi a|e enỽ
oed bernart. yr hỽnn a drychaf+
| « p 116r | p 117r » |