Philadelphia MS. 8680 – page 33v
Brut y Brenhinoedd
33v
51
teyrnassoed racdaỽ rac y
dyuot y oresgyn eu|kyuo+
etheu. ac eu|gỽladoed.
Ac ỽrth hynny rac gouei+
lon a|phrydereu. ssef a|w+
naei baỽp o·nadunt at+
newydu y keyryd a|r di+
nassoed a|r tyreu a|r kes+
tyỻ. ac adeilat ereiỻ o neỽ+
yd yn|ỻeoed cryno. Sef
achaỽs oed hynny. o|r del+
hei arthur am eu penn.
Megys y keffynt y ỻeoed
kadarn hynny yn am+
diffyn o|r|bei reit. A|gỽe+
dy gỽybot o arthur bot
y ofyn ueỻy ar|baỽp. Ym+
ardyrchauel a|oruc yntev.
a|medylyaỽ goresgyn yr
hoỻ europpa. Sef oed hyn+
ny trayan y byt. Ac ody+
na parattoi ỻyghes a|o+
ruc. ac yn gyntaf kyr+
chu ỻychlyn a|oruc. hyt
pan uei leu uab kynuar+
ch y daỽ ef gan y chwaer
52
a|wnelei ef yn urenhin yno.
Canys nei uab chwaer o+
ed leu uab kynuarch y
urenhin a|uuassei uarỽ
yna. ac ef a gymynassei
y vrenhinyaeth y leu y
nei. Ac ny buassei deilỽng
gan y ỻychlynwyr hynny.
Namyn gỽneuthur ri+
gỽlff yn urenhin arnadunt.
a|chadarnhau eu kestyỻ ac
eu|dinassoed gan debygu
gaỻu gỽrthỽynebu y arthur.
Ac yn yr amser hỽnnỽ yd
oed walchmei uab ỻeu yn
deudegmlỽyd. gỽedy y ro+
di o|e ewythyr ef yg|gỽassa+
naeth siplius bab ruuein.
ac y gan siplius y kymer+
th ef arueu yn gyntaf.
A|gỽedy dyuot arthur
megys y|dywespỽyt uchot
y draeth ỻychlyn. Rigỽlff
a|hoỻ uarchogyon y wlat
y·gyt ac ef a|deuth yn erbyn
arthur a|dechreu ymlad ac ef.
| « p 33r | p 34r » |