Breudwd Welsh Prose 1300-1425
Cymraeg

Oxford Jesus College MS. 111 (The Red Book of Hergest) – page 126r

Hwsmonaeth

126r

520

O * Gyghor y|doeth y keueis me+
gys yd|oed ynteu yn kygho+
ri y vab. val hynn. vy mab
dỽc dy uuched yn gaỻ o·blegyt duỽ.
a|r|byt. Yn|gyntaf o|duỽ medylya
diodeifeint iessu grist y·rot. a char
ef yn vỽyaf dim. a bit arnat y ofyn.
a chadỽ y gymynediweu. O·blegyt
y byt. medylya am|rot y ffuruauen.
megys y try. yr hỽnn a|uo yr aỽr
honn yn uchaf. yn|y ỻe y|byd yn iss+
af. veỻy y kyfoethaỽc. mynych yỽ
idaỽ syrthaỽ y myỽn tlodi. A|r tlaỽt
yn gyfoethaỽc ỻawer gỽeith o damỽ+
ein. Wrth hynny yd yttỽyf yn ado+
lỽyn itt ỻywyaỽ dy uuched herỽyd
dy|aỻu. a|th|tir a|th dayar. ac nyt yn
vỽy. O geỻy dyrchauel ỻes o|th tir
a|th|daear yn aniueileit. neu o gaỻ+
der araỻ. dot hỽnnỽ yn ystor itt.
Sef achaỽs yỽ. o phaỻa yr yt itt.
neu o|r byd marỽ yr aniueileit. neu
dyfot ỻosc. neu ryỽ damwein dyrys
araỻ. tidi bieu yr ystor a gedweist
ac o|r treuly ni yn|y ulỽydyn ys+
tent. a|ffrỽyth dy tir a|th dayar. a
damweinaỽ un o|r pynckeu vry.
nyt oes ymwaret o·nyt echwyna.
Achaỽs ef a|dyweit y doeth. a|e·chỽ+
ynno gan araỻ ef a|gyỻ yr eidaỽ e
hun. megys y gwna y rei aghyn+
nil. gỽerthu yr chweugeint. ac
elchỽyl y brynu yr punt gan yr un
rei. achaỽs ef a|dyweit y|doeth. a ym+
achuppo o|r blaen o|beỻ. agos y|keiff
y les. Y|mae ỻawer o|dynyon a
thir a|dayar udunt. ny wdant y|lyw+
yaỽ yn|da. Mi a|dywedaf itt py|a+
chaỽs. achaỽs eu|bot yn buchedoc+
kau heb ymachub o|r blaen. heb
lywodraeth iaỽn eithyr treulaỽ
a|distriỽ o|r blaen. mỽy noc a tal eu
hystent yn|y vlỽydyn. Ac yma ny
byd idaỽ dim a dotto yn|y geneu. o+
nyt dỽyn y uuched drỽy drueni. a
thlodi. ac na aỻant wneuthur dim

521

oc eu ỻes e|hun. ỽrth hynny byd gaỻ
ac ymỽrthlad a|r|byt tỽyỻodrus. Na uyd
gamwedaỽc ỽrth neb. ac na dechymic ar+
naỽ gam yr chwant. Megys y|dyweit y
doeth. Blỽydyn ef a|gerda kamwed. Ac|o|r
diwed hi a|gilya. O ryres dy wyr y myỽn
dirwyeu. yn|dy lys. drỽy gyghor dy wyr
unwed ac wynt e|hunein dirỽya ỽynt. Ac
etto o|r byd maỽr hynny. bit weỻ dy|gytwy+
bot di a ỻeihaa. megys y bo bodlaỽn duỽ
a|dynyon itt. achaỽs yỽ. kymer da dy|wyr
bob echedic. a|digaỽn a vyd udunt. a thitheu
a geffy lawer ỽrth y|gyfrif. Dala gedym+
deithas a|th wyreeinc. Kar dy gymodogyon
a haed arnunt dy garu. kanys kywirdeb
a|uyd o bop parth. Kadỽ dy defaỽt yn|gaỻ.
rac tremygu neb. a|r da a rodes duỽ itt.
trefna ef yn|gyfyaỽn ac yn|diwaratwyd.
O|r treul a|ỽnelych gỽybyd pedwar|pỽnc.
vn yỽ. pa|gymeint a|rodych. a|pha|acha+
ỽs. a pha|diw. a pha|amser. Kyntaf yỽ
dyro kyny uot yn reit rodi. kanys gỽeỻ
yỽ deusỽỻt diryaỽ*. no thrugeint drỽy
anuod. Yr eil yỽ o rody dy da. dyro drỽy
ewyỻys da. ac yna y diolchir itt yn|deu+
dyblic. Ac os rody yn rywyr drỽy gymeỻ
koỻeist dy|rod. Try·dyd yỽ. dyro y|r hỽnn
a aỻo ỻes ac afles itt. Pedwyryd yỽ. pa
gymeint bynnac a rodych na|uit vỽy na
ỻei noc y bo grymuster y person. a hefyt
megys y bo grymuster dy neges ditheu.
Synnya ar y tlodyon. nyt yr clot bydaỽl.
namyn yr karyat duỽ. yr hỽnn a|rodes itt
bop da. Stenta dy dir a|th dayar drỽy
wyr ffydlaỽn a vo tyghedic itt. Yn|gyntaf
edrych beth a|dalo dy|dir bỽrd. Gardeu.
Colomendyeu. Perỻanneu. Beth a|dalant
drỽy y vlỽydyn yn|gyffredin. A|gỽedy
hynny a|eỻych y werthu yn|diogel. ac
yn|digoỻet. bit itt dy hun yn ystor.
Melineu a|physcotlynneu. beth a|dalo y
rei hynny yn|y vlỽydyn. Vchelwyr a
meibon eiỻon beth a|del y|gantunt ỽy.
A|pha|beth a|ganhalyant. Gỽybyd dros
hynny drỽy ffydlondeb yn aryant hyt
na|aỻer elchỽyl dy dỽyỻaỽ. Gwybyd

 

The text Hwsmonaeth starts on Column 520 line 1.