Breudwd Welsh Prose 1300-1425
Cymraeg

NLW MS. Peniarth 19 – page 149r

Brut y Tywysogion

149r

641

uab maredud uab yr arglỽyd rys
archdiagon keredigyaỽn. Y vlỽy+
dyn rac·wyneb y kywarsangaỽd
henri vrenhin lawer o gymry yn ang+
hyfreithaỽl. Y vlỽydyn rac·wyneb
y bu uarỽ rys mechyỻ uab rys
gryc. Y vlỽydyn honno y keissya+
ỽd grufud uab ỻywelyn diangk
o garchar y brenhin yn ỻundein. we+
dy bỽrỽ raff drỽy fenestyr y tỽr
aỻan. a|disgynnu ar|hyt y raff.
ac yna torri y raff. a|e syrthyaỽ
ynteu yny dorres y vynỽgỽl. ac
yna y ỻidiaỽd dauyd uab ỻywelyn.
a dyuynnu a|oruc y hoỻ wyrda y+
gyt. a ruthraỽ y elynyon o|e hoỻ
deruyneu dyeithyr a oedynt y my+
ỽn kestyỻ. ac anuon kenadeu a
ỻythyreu a|wnaeth. a|dyuynnv
attaỽ hoỻ tywyssogyon kymry.
a phaỽb a gyuunaỽd ac ef dy+
eithyr gruffud uab madaỽc. a
grufud uab gỽenỽynwyn. a mor+
gan uab howel. aỻawer o goỻ+
edeu a|wnaeth ef y|r rei hynny.
a|e kymeỻ o|e hanuod y darostỽg
idaỽ. Y vlỽydyn honno y bu uarỽ
maredud uab rotpert pen·kyng+
horỽr kymry. wedy kymryt abit
crefyd yn ystrat flur. Y vlỽydyn
rac·wyneb y kynuỻaỽd henri
vrenhin gedernyt ỻoegyr ac Jwer+
don ar uedyr darostỽg hoỻ gym+
ry idaỽ. ac y doeth hyt yn|tegan+
nỽy. a gỽedy kadarnhau y kasteỻ

642

ac adaỽ marchogyon yndaỽ yd
ymchoelaỽd y loegyr. gan adaỽ
aneiryf o|e lu yn galaned heb
eu cladu. wedy ỻad rei. a bodi ereiỻ.
Y vlỽydyn rac·ỽyneb y bu uarỽ
dauyd uab ỻywelyn yn aber conỽy.
vis maỽrth. ac y cladỽyt gyt a|e
dat yn aber conỽy. A gỽedy nat
oed etiued o gorf idaỽ y gỽle+
dychaỽd owein goch a ỻywelyn
y nyeint meibyon gruffud uab
ỻywelyn y vraỽt yn|y|ol. Y rei
hynny o gynghor gỽyrda. a
rannyssant y kyuoeth yn deu
hanner y·rygthunt. Y vlỽydyn
honno yd anuones henri vrenhin
nicolas dy mulus. a maredud
uab rys. a Maredud uab owein
y digyuoethi maelgỽn vychan.
Ac yna y goruu ar vaelgỽn
a|e eidaỽ ffo hyt yg|gỽyned.
ac owein a ỻywein veibyon
grufud uab ỻywelyn gan adaỽ
eu kyuoeth y estronyon. ac o
achaỽs bot brenhinaỽl aỻu
yn|dyvynnu paỽb o|r a vei gyfun
a|r brenhin yn erbyn owein a
ỻywelyn. a Maelgỽn. a howel
uab maredud o wlat vorgan
a|oed yna yg|gỽyned gyt ac
ỽynt. wedy y digyuoethi yn
gỽbyl o Jarỻ clar. a gỽedy
gỽybot o·honunt yd ymgat+
wassant yn|y mynyded. a|r
ynyalỽch. Y vlỽydyn honno y