Oxford Jesus College MS. 111 (The Red Book of Hergest) – page 167r
Peredur
167r
677
ymlad a|wnaeth peredur a|r ỻu. ac erbyn
echwyd neur daroed idaỽ ỻad trayan y ỻu heb
argywedu neb arnaỽ ef. Ac yna y|dywaỽt y
wreic ohen. neur derỽ y|r mackỽy ỻad ỻawer
o|th|lu. a dyro naỽd idaỽ. Na rodaf myn vyg
cret heb·yr ynteu. a|r wreic ohen. a|r uorỽyn
dec y|ar vỽlch y gaer yd oed·ynt yn|edrych. ac
yn|hynny ymgyvaruot o peredur a|r gỽas me+
lyn a|e lad. arglỽyd heb y uorỽyn dyro naỽd
y|r mackỽy. na rodaf y·rof|i a|duỽ heb y gỽr ỻỽyt.
ac ar hynny ymgyvaruot o peredur a|r gỽas gỽ+
ineu a|e lad. Buassei weỻ itti pei rodassut na+
ỽd y|r mackỽy kynn ỻad dy deu uab o·honaỽ.
ac abreid vyd y titheu dy hun o|r dihegy. Dos
ditheu vorỽyn ac adolỽyn y|r mackỽy rodi
naỽd ynni. kannys rodassam ni idaw ef.
A|r vorỽyn a|doeth y|r ỻe yd oed peredur. ac
erchi naỽd y that a|oruc. ac y|r saỽl a|dihag+
yssei o|e|wyr yn|vyỽ. Keffy dan amot mynet
o|th tat a|phaỽb o|r yssyd y·danaỽ y ỽrhau y|r
amheraỽdyr arthur. ac y|dywedut idaỽ pan+
yỽ peredur gỽr idaỽ a|wnaeth y gỽassanaeth
hỽnn. Gỽnaỽn y·rof|i a|duỽ yn|ỻawen. a
chymryt bedyd ohonaỽch. a|minneu a|an+
uonaf att arthur. y erchi idaỽ rodi y dyffrynn
hỽnn ytti. ac y|th ettiued byth gỽedy ti. ac y+
na y|doethant y myỽn. a chyuarch gỽeỻ
a|wnaeth y|gỽr ỻỽyt a|r wreic vawr y peredur.
Ac yna y|dywaỽt y|gỽr ỻỽyt. Yr|pan yttwyf
ynn medu y|dyffrynn hỽnn. mi ny weleis
gristaỽn a|elei a|e eneit gantaỽ namyn ti.
a ninne a|aỽn y wrhau y arthur ac y gym+
ryt cret a|bedyd. Ac yna y|dywaỽt peredur
diolchaf ynneu y|duỽ. na thorreis vy ỻỽ
ỽrth y|wreic vỽyhaf a|garaf. na|dywedỽn
un geir ỽrth gristaỽn. Trigyaỽ yno a|ỽ+
naethant y nos honno. Trannoeth y bo+
re yd|aeth y|gỽr ỻỽyt a|e niuer gantaỽ y
lys arthur. ac y gỽrhayssant y arthur.
ac y paraỽd arthur eu|bedydyaỽ. Ac y
dywaỽt y|gỽr ỻỽyt y arthur panyỽ peredur
a|e goruuassei. ac arthur a|rodes y|r gỽr
ỻỽyt a|e|niuer y dyffryn o|e gynnal y·da+
naỽ ef mal yd|erchis peredur. a chan gennat
arthur y|gỽr ỻỽyt a|aeth ymeith parth a|r
dyffryn crỽnn. Peredur ynteu a|gerdaỽd
678
y bore drannoeth racdaỽ talym maỽr o|dif+
feith. heb gaffel kyuanned. Ac yn|y diwed ef
a|doeth y gyuanned bychann amdlaỽt. ac
yno y clywei uot sarff yn gorwed ar uodrỽy
eur. heb adel kyfuanned seith miỻtir o|bop
parth idi. Ac yd|aeth peredur y|r ỻe y clywei
vot y sarff. ac ymlad a|wnaeth a|r sarff yn
ỻidyaỽcdrut ffenedic·ualch. Ac yn|y diwed y
ỻadaỽd. ac y kymerth y votrỽy idaỽ e|hun.
ac ueỻy y bu ef yn|hir yn|yr agherdet hỽnnỽ.
heb dywedut vn geir ỽrth neb ryỽ gristaỽn.
ac o|hynny yd yttoed yn koỻi y|liỽ a|e wed o tra
hiraeth yn ol ỻys arthur a|r wreic vỽyaf a
garei. a|e gedymdeithon. Odyna y|kerdaỽd
racdaỽ y lys arthur. ac ar|y fford y kyfuaruu
ac ef teulu arthur. a chei yn eu|blaen yn my+
net y neges udunt. Peredur a|atwaenat baỽp
o·nadunt. ac nyt atwaey* neb o|r|teulu euo.
Pan|deuy di vnbenn heb·y|kei. a dỽyweith a the+
ir. ac nyt attebei ef. Y|wan a|oruc kei a gỽaeỽ
trỽy y uordỽyt. Ac rac kymeỻ arnaỽ dywedut
a thorri y|gret mynet heibyaỽ a|oruc heb ym+
attila ac ef. Ac yna y|dywaỽt gỽalchmei.
Yrof|i a|duỽ gei drỽc y medreist kyflauanu ar
uackỽy ual hỽnn yr na|aỻei dywedut. ac
ymchoelut dra|e|geuyn y lys arthur. arglỽy+
des heb ef ỽrth wenhỽyuar. a|wely di drycket
y gyflauan a|oruc kei ar y mackỽy hỽnn
yr na|aỻei dywedut. ac yr duỽ ac y·rof ynneu
par di y uedeginyaethu ef erbyn pan|delỽyf
drachefyn. a mi a|dalaf y pỽyth itt. a chynn
dyuot y gỽyr oc eu neges ef a|deuth marcha+
ỽc y|r weirglaỽd y ymyl ỻys arthur y|erchi
gwr y ymwan. a hynny a gauas. a|bỽrỽ hỽn+
nỽ a|wnaeth peredur. ac wythnos y bu yn|bỽrỽ
marchaỽc beunyd. A diwarnaỽt yd|oed ar+
thur a|e teulu yn|dyuot y|r eglỽys. Sef y gỽe+
lynt marchaỽc gỽedy dyrchauel arwyd ym+
wan. Ha|wyr heb·yr arthur. myn gỽrhyt gỽyr
nyt af odyma yny gaffwyf vy|march a|m ar+
ueu y|vỽrỽ y ianghỽr racko. Yna yd|aeth
gỽeisson yn ol y uarch a|e arueu y arthur.
A|pheredur a|gyfaruu a|r gỽeisson yn mynet
heibaỽ. ac a|gymerth y march a|r arueu
a|r|weirglaỽd a|gyrchaỽd. Sef a|wnaeth
paỽp o|e welet ef yn|kyuodi ac yn mynet y
| « p 166v | p 167v » |