NLW MS. Peniarth 19 – page 19r
Brut y Brenhinoedd
19r
73
1
arueu. a bỽyt. A gỽedy daruot
2
idaỽ hynny kychwyn a|oruc ef
3
ac asaracus a|r hoỻ gynnulleit+
4
ua o|r gwyr a|r gwraged a|r mei+
5
byon a|r|anreithyeu ganthunt
6
hyt yn ynyalỽch y diffeith a|r
7
coedyd. ac odyna yd anuones
8
brutus lythyr hyt ar bandrasus
9
vrenhin groec yn|y mod hỽnn.
10
B Rutus tywyssaỽc gỽe+
11
diỻon kenedyl droea
12
yn anuon annerch y bandrasus
13
vrenhin groec. A menegi idaỽ
14
nat oed deilỽg idaỽ attal yg
15
keithiwet eglur vrenhinaỽl
16
genedyl o lin dardan. ac eu kei+
17
thiwaỽ ˄yn amgen noc y dylyynt
18
yn herỽyd eu boned. Ac ỽrth
19
hynny y mae brutus yn mene+
20
gi idaỽ bot yn weỻ ganthunt
21
ỽy eu pressỽylyaỽ a chartrefu
22
yn|y diffeith. ac ymborth mal
23
aniueilyeit ar gic amrỽt a
24
ỻysseu. noc yg|kyuanned ar
25
wledeu a melyster y·dan geith+
26
iwet. Ac os codi goruchelder dy
27
vedyant a|th gyuoeth di. a wna
28
hynny. na dot yn eu herbyn
29
ỽy. namyn madeu udunt. ka+
30
nys anyan a|dylyet yỽ y bob
31
kaeth ỻauuryaỽ o bop ford y
32
ymchoelut ar y hen deilygdaỽt
33
a|e rydit. Ac ỽrth hynny yd arch+
34
ỽn ni dy drugared di yny gyn+
35
hettych udunt pressỽylaỽ yn|y
74
1
coedyd y ffoassant udunt gan
2
rydit. neu ynteu o·ny edy hyn+
3
ny udunt y|th deyrnas di gan
4
rydit. goỻỽg ỽynt gan dy gan+
5
nyat. y wladoed y byt y geissyaỽ
6
pressỽyluot heb geithiwet.
7
A gỽedy gỽelet o bandrasus
8
y llythyr hỽnnỽ a|e dar+
9
ỻein rac y vronn. a|galỽ attaỽ
10
y gyghorwyr. Sef a|gaỽssant
11
yn eu kyghor ỻuydyaỽ yn eu
12
hol. ac eu hymlit. kanys blỽg
13
vu gan wyr groec y genedyl
14
a ry vuassei y saỽl vlỽynyded
15
hynny yg|keithiwet ydanunt.
16
ỻyuassu o·honunt ỽynteu an+
17
uon y ryỽ lythyr hỽnnỽ at+
18
tunt ỽy. na medylyaỽ o·hon+
19
unt keissyaỽ bỽrỽ gỽed keith+
20
iwet y arnunt. Ac ỽrth hynny
21
y kafas gỽyr groec yn eu kyg+
22
hor ỻuydyaỽ yn eu hol. a cheis+
23
syaỽ eu kymheỻ y eu keithiwet.
24
Ac ual yd oed bandrasus a|e lu yn
25
kyrchu y diffeith y|tebygynt bot
26
brutus yndaỽ. Ac ual yd oedynt
27
yn mynet heb·laỽ y casteỻ a|elwit
28
sparatintus. eu kyrchu yn di+
29
rybud a|oruc brutus udunt.
30
a their|mil o wyr aruaỽc gan+
31
thaỽ. kanys yn diarwybot y|doeth
32
brutus a hynny o wyr ygyt ac ef.
33
ac eu kyrchu a|oruc gỽyr troea.
34
udunt yn wychyr. a|ỻad aerua
35
diruaỽr y meint ohonunt. a|ffo
| « p 18v | p 19v » |