Philadelphia MS. 8680 – page 39v
Brut y Brenhinoedd
39v
75
bot yn iaỽn y titheu wneu+
thur iaỽn o|r sarhaedeu
hynny. Minneu a|archaf
ytti dyuot y ruuein erbyn
y calan aỽst nessaf. y wneu+
thur iaỽn o|r saỽl sarhae+
deu hynny mal y barno
sened ruvein arnat. Ac o+
ny deuy di yn|y racdywede+
dic deruyn yno. Edne+
bid di y deuaf|i y|th teruyn
di. a pha|beth bynnac a
gribdeileist ti o|th ennỽir+
ed. Minneu a|e|dygaf dra+
cheuyn yny uont kym+
herued y cleuydeu yn ran+
nu rom.
A Gỽedy datkanu y ỻy+
thyr hỽnnỽ rac bron
arthur. a|r brenhined a|r
tywyssogyon a|odynt y+
gyt ac ef. ef ac ỽynt a|ae+
thant y·gyt hyt yn tỽr y
keỽri y gymryt kyghor
py beth a|ỽnelynt yn|er+
byn y kymynediweu hyn+
76
ny. Ac ual yd|oedynt yn ys+
kynnu gradeu y tỽr. Kadỽr
iarỻ kernyỽ megys gỽr
ỻawen y|uedỽl a|dywaỽt yr
ymadraỽd hỽnn. Kyn no|hynn.
ofyn a|ry|uu arnaf|i rac gor+
uot o lesged y brytanyeit
o hir hedỽch. a|choỻi clot eu
milỽryaeth. o|r honn y buant
hỽy eglurach no neb o gened+
yl y byt yn hoỻaỽl. Sef a+
chaỽs yỽ. yn|y|ỻe y peiter ac
arueru o arueu. ac o|r wydbỽ+
yỻ. a|r daplas. a|serch gỽraged.
Nyt oes petruster yna ỻygru
o lesged py beth bynnac a
ry|uei o nerth yno a|cheder+
nyt ac enryded a chlot.
Canys pump mlyned hae+
ach a|r|ethynt yr pan yttym
ni yn arueru o|r ryỽ seguryt
honno a|r|digrifỽch a heb
arueru o diwyỻ ymlad.
ac ỽrth hynny duỽ yr myn+
nu an|rydhau o|r|ỻesged honno
a gyffroes gỽyr ruuein yn
| « p 39r | p 40r » |