Oxford Jesus College MS. 111 (The Red Book of Hergest) – page 190v
Geraint
190v
770
Henpyllch gỽell arglỽyd heb ef. Duỽ a|rodho
da it heb·yr ynteu. a|gresso duỽ ỽrthyt. ac a|oes
chỽedleu o neỽyd gennyt ti. Oes arglỽyd heb+
yr ynteu. Nyt atwen i dydi heb·yr arthur.
Ryued yỽ gennyf i na|m atwaenost. a fforestỽr
itti arglỽyd ỽyf|i yn|forest y dena. a madaỽc
yỽ vy enỽ i uab tỽrgadarn. Dywet ti dy
chwedleu heb·yr arthur. Dywedaf arglỽyd
heb ef. Karỽ a|weleis yn|y forest. ac ny
weleis yr·moet y gyfryỽ. Pa|beth yssyd ar+
naỽ ef heb·yr arthur. pryt na welut eiryoet
y gyfryỽ. Purwyn arglỽyd yỽ. ac ny
cherda gyt ac un aniueil o ryuic a|balch+
der rac y urenhineidet. ac y ouyn kyngor
itti arglỽyd y dodỽyf beth yỽ dy gynghor am+
danaỽ. Jawnaf y gỽnaf|i heb·yr arthur. my+
net y hela ef auory yn ieuenctit y dyd.
a|pheri rybud heno ar|baỽb o|r ỻettyeu.
ac ar ryfuerys oed bennkynyd y arthur.
ac ar eliuri oed benn mackỽy. ac ar baỽb y
am hynny. ac ar hynny y trigyassant. a
geỻỽng y mackỽy o|r blaen a|oruc. Ac yna
y dywaỽt gỽenhỽyuar ỽrth arthur. arglỽ+
yd heb hi a|gennhedy di vyvi auory y uynet
y edrych ac y warandaỽ ar hela y karỽ a|dyỽ+
aỽt y mackỽy. Kanhadaf yn|ỻaỽen heb·yr
arthur. Minneu a|af heb hi. ac yna y|dywaỽt
gỽalchmei ỽrth arthur. Arglỽyd heb ynteu
ponyt oed iaỽn y|titheu. kanhadu y|r neb y
delei hỽnnỽ attaỽ yn|y helua. ỻad y benn a|e
rodi y|r neb y|mynhei ae y|orderch idaỽ e|hun
ae y|orderch y gedymdeith idaỽ. na marchaỽc
na phedestyr y|del idaỽ. Kanhadaf yn ỻawen
heb·yr arthur. a|bit y keryd ar y|distein ony
byd paraỽt paỽp auory y uynet y hela. a thr+
eulaỽ y nos a|orugant drỽy gymodrolder o
gerdeu a|didanỽch ac ymdidaneu a diwaỻ was+
sanaeth. A phan uu amser gan baỽp onadunt
vynet y gyscu. ỽynt a|aethant. a phan doeth
y|dyd drannoeth. deffroi a|orugant. a galỽ
a|oruc arthur ar y gỽeisson. a|gadwei y|wely.
Nyt amgen. pedwar mackỽy. Sef rei oedynt.
Cadyrieith uab porthaỽr gandỽy. ac amhren
uab bedwyr. ac amhar uab arthur. a goreu
uab Custennyn. A|r gỽyr hynny a|doethant att
arthur. ac a|gyuarchassant weỻ idaỽ. ac a|wisc ̷+
771
assant ymdanaỽ. a ryuedu a|oruc arthur na def+
froes gỽenhỽyuar. ac nat ymdroes yn|y gỽely.
a|r|gỽyr a|uynnyssynt y deffroi. Na deffroỽch hi
heb·yr arthur. kanys gỽeỻ genthi gyscu no
mynet y edrych ar yr hela. ac yna y kerdaỽd
arthur racdaỽ. ac ef a|glyỽei deu gorn yn canu.
vn yn ymyl ỻetty y pennkynyd. a|r ỻaỻ yn ym+
yl ỻetty y penn mackỽy. a|ỻỽyr dygyuor kỽbyl
o|r niueroed a|doethant att arthur. a|cherdet
a|orugant parth a|r fforest. A gỽedy mynet
arthur odieithyr y ỻys y deffroes gỽenhỽyuar
a|galỽ ar y morynyon a|oruc a|gỽiscaỽ ymdan+
ei. a uorynyon heb hi. mi a|gymereis gennat
neithỽyr y uynet y edrych ar yr hela. ac aet
un ohonaỽch y|r ystabyl a|pharet dyuot ac a
uo o uarch o|r a|wedo y wraged eu marchoga+
eth. ac ef a|aeth vn o·nadunt. ac ny chahat
yn|yr ystabyl namyn deu uarch. a gỽenhỽy+
uar ac un o|r morynyon a|aethant ar y deu
uarch. ac ỽynt a|doethant drỽy wysc. a|ỻusc
y gỽyr a|r meirch a gynhalyssant. Ac ual y
bydynt yn kerdet uelly ỽynt a|glywynt tỽryf
maỽr angherdaỽl. ac edrych a|orugant dra|e
keuyn. ac ỽynt a|welynt uarchaỽc ar eba+
ỽluarch helyclei athrugar y ueint. a mac+
kỽy gỽyneu Jeuanc esgeirnoeth teyrneid
arnaỽ. a chledyf eurdỽrn ar y glun. a|pheis
a syrkot o bali ymdanaỽ. a|dỽy eskit issel
o|gordwal am y|draet. a|ỻenn o borffor glas
ar warthaf hynny. ac aual eur ỽrth bop
cỽrr idi. a|cherdet yn uchelualch drybelit+
ffraeth gyssonuyr a|wnaei y march. ac
ymordiwes a|gỽennhỽyuar a|oruc. a|chyuarch
gỽeỻ idi a|oruc. Duỽ a|rodho da itt ereint
heb·yr hitheu. a mi a|th adnabuum pann
yth weleis gyntaf gynneu. a gressaỽ duỽ
ỽrthyt. a|phaham nat aethost di gyt a|th
arglỽyd y|hela. am na wybuum pan|aeth
heb ef. Minneu a|ryuedeis heb hi gaỻu o+
honaỽ ef vynet yn|dirybud y mi. Je
arglỽydes heb ef. kyscu a|wneuthum i ual
na|wybuum pan aeth ef. a goreu vn kedym+
deith genhyf|i heb hi vyg|kedymdeithas ar+
naỽ yn|y kyuoeth oỻ wyt ti o|was ieuanc.
ac ef a|aỻei uot yn|gyn|digriuet ymi o|r he+
la ac udunt ỽynteu. kanys ni a glywn y
| « p 190r | p 191r » |