Philadelphia MS. 8680 – page 40r
Brut y Brenhinoedd
40r
77
yn an herbyn hyt pan alwem
ni an clot ac an milỽryaeth
ar y hen gyneuaỽt. A|gỽe ̷+
dy dywedut o gadỽr yr yma+
drodyon hynny a|ỻawer o rei
ereiỻ. o|r|diwed wynt a|deu+
thant y|r eisteduaeu.
A gỽedy eisted o baỽp yn|y|le
arthur a|dywaỽt ual hynn
ỽrthunt. Vyg|kedymdeithon
ar rwyd ac ar dyrys moly+
ant y|r rei hyt hynny. ac
ymrodi eu kyghoreu ac
eu milỽryaeth. Ac yr aỽr honn
o|un|uryt rodỽch aỽch kyg+
hor. Ac yn|doeth rac·uedyly+
ỽch pa beth a|uo iaỽn y atteb
yn|erbyn yr attebyon hynn.
kanys py beth bynnac a|rac+
uedylyer yn|da yn|y blaen y
gan doethon. Pan|del ar we+
ithret haỽs uyd y diodef.
Ac ỽrth hynny. haỽs y gaỻ+
ỽn ninneu diodef ryuel gỽ+
yr ruuein. os o|gyffredin gy+
uundeb a|chytgyr* yn|doeth
78
y racuedylywn pa wed y
gaỻom ni gỽahanu ac
eu|ryuel ỽynt. A|r ryuel
hỽnnỽ herwyd y|tebygaf|i
nyt maỽr reit ynn y ofni.
Canys andylyedus y|ma+
ent hỽy yn erchi teyrnget
o ynys prydein. Kanys ef a
dyweit dylyu y dalu idaỽ ef
ỽrth y dalu y ulkessar ac
y ereiỻ gỽedy hỽnnỽ. a
hynny achaỽs teruysc ac
annuundeb y·rỽng ann
hen·dadeu ninheu. a|du+
gassant wyr ruuein y|r
ynys honn. ac o|dreis y
gỽnaethant yn|trethaỽl.
Ac ỽrth hynny pa|beth
bynnac a|gaffer drỽy na
thỽyỻ na|chedernit. nyt
o dylyet y kynhelir hỽnnỽ.
Pỽy bynnac a|dycko treis
peth andylyedus a geis y
gynnal. a|chanys andyly+
edus y maent hỽy yn|keiss+
aỽ teyrnget y gennym ni.
| « p 39v | p 40v » |