Oxford Jesus College MS. 111 (The Red Book of Hergest) – page 218r
Ystoria Bown de Hamtwn
218r
876
1
a|luyda ar hynt. ac ef a|e hoỻ aỻu gyt
2
ac ef a|gerdant tu a|dabilent. ac ny thric
3
gyt a ninneu gỽedy hynny onyt ychydic
4
o niuer. ac yueỻy y gaỻỽn dianc yn da.
5
ỻyna gynghor da heb·y boỽn. a|r gỽr a|ỽ+
6
naeth y ffuruauen a|th differo ditheu rac
7
pob drỽc. ar hynny nachaf iuor a|r bren+
8
hined ereiỻ oỻ yn|dyuot y myỽn y|r ỻys.
9
a|e hela a|dangosses ef idi hi ar hynt.
10
A gỽedy hynny edrych ar boỽn a|wnaeth
11
ef. a gofyn idaỽ o pa|le pan hanoed. ac o pa|le
12
pan dathoed y palmer. arglỽyd heb ynteu
13
mi a|deuthum o nubie. o varbari. o|r inde.
14
o aỽffric. o asie. ac ny buum i yn|dabilent.
15
kany chaỽn fford y myỽn. Sef achaỽs oed.
16
brenhin lỽmbardi a|e hoỻ aỻu yssyd yg
17
kylch y kasteỻ. ac idrac yỽ y enỽ de ualri.
18
a|r gỽr bieu y kasteỻ yssyd y myỽn. ac o+
19
ny cheif nerth a chanhorthỽy yn ebrỽyd.
20
ef a|geir y kasteỻ y arnaỽ. ac ynteu a|dif+
21
fetheir. Ygyt ac y kigleu iuor hynny tar+
22
du y gỽaet trỽy y|eneu a|e dỽy ffroen.
23
Mahumet heb ef. os gỽr diuetha uyd vym
24
braỽt i ny bydaf vyỽ i wedy hynny. ac erch+
25
i y baỽp gỽisgaỽ eu harueu. ac eu|fford a
26
gymerassant racdunt tu a|dabilent. a bren+
27
hin a|edewis ef yn|y ol y warchadỽ iosian.
28
a|ỻỽyt oed. a garsi oed y enỽ. a mil o uar+
29
chogyon a|edewit gyt ac ef. Gỽedy gỽelet
30
o Josian adaỽ garsi o|e gỽarchadỽ hi.
31
trỽm oed genthi y bryt. a|drỽc oed y chys+
32
syr. Sef a|wnaeth bonffei yna dyuot at+
33
tei. a|e|didanu. a dywedut ỽrthi. y parei ef
34
idi gael dianc y nos honno. a ỻyma y ffu+
35
ryf y paraf. Mi a atwen lyssewyn ac a|e
36
kaffaff yn|y weirglaỽd obry. ac nyt oes neb
37
o|r a|yuo dim o|e sud ny bo medỽ. a minneu
38
a|af o|r ỻe. a uedaf pỽnn march o|r ỻysseu.
39
ac ar uarch y dygaf yman. a|gỽ edy hynny
40
mi a|e|briwaf myỽn morter. a|e s ud yn ehala+
41
eth a vyryaf yn|y tunneỻeu gỽi n. A|phan uo
42
garsi y chwinsa yn sỽperu dec hreu nos. mi
877
1
a|wassanaethaf arnaỽ a|e gedymdeithon
2
o|r gỽin hỽnnỽ yn ehalaeth didlaỽt. ac
3
yna y gỽely di euo a|e|gedymdeithon yn dy+
4
gỽydaỽ y|r ỻaỽr o ueddaỽt. ac yn kyscu megys
5
moch. a gỽedy hynny mi a boỽn a|wiscỽn
6
yn harueu ymdanam. a thitheu a|wisgy
7
ymdanat. a gỽedy hynny ni a|gerdỽn
8
ragom. a chynn duhunaỽ garsi ni a uyd+
9
ỽn ympeỻ odyman. ac megys y dywaỽt
10
bonnffei hynny a|wnaethpỽyt. A gỽedy
11
medwi paỽp a|e dygỽydaỽ y|r ỻaỽr a|e kys+
12
gu. Hỽynteu a ymgỽeirassant ac a wisgas+
13
sant ymdanunt. a|gỽedy hynny boỽn a
14
elwis ar Josian. a hitheu a|deuth attaỽ
15
ac a|dywaỽt ỽrthaỽ. Arglỽyd heb hi ni
16
a dygỽn dec sỽmer yn ỻaỽn o eur gyt a ni
17
y fford y kerdom. Na dygỽn heb·y boỽn.
18
pei at·ueỽn i yn ỻoeger wedy daruot im
19
ỻad uy ỻystat. digaỽn o|da a|chyuoeth a
20
gaffỽn ỽrth vy ewyỻys. Gỽir a|dywedy
21
arglỽyd heb·y bonffei. ac eissoes reit uyd
22
it rodi ỻawer dyrnaỽt kyn|no|hynny. a
23
huryaỽ marchogyon gyt a|thi ỽrth ry+
24
uelu a|th lystat. ac ỽrth hynny y mae da
25
in dỽyn yr eur. A|r|diaereb a dyweit.
26
Gỽeỻ un kanhorthỽ* da no deu uys. Yn
27
ỻaỽen heb·y boỽn a|gỽneỽch chwitheu.
28
Yna y darchafyssant y sỽmereu ar y
29
meirch. ac yd esgynnassant ỽynteu
30
a|chymryt eu fford racdunt. Tranno+
31
eth y bore y|duhunaỽd garsi. y gỽr a
32
dylyei gadỽ Josian. a|phan|duhunaỽd
33
ryuedu a|wnaeth paham y gỽnathoed+
34
it yn uedỽ. ac edrych a|wnaeth ynteu
35
ar y uodrỽy. ac yn|y uodrỽy yd oed
36
maen karbỽnculus gloeỽ. a phỽy byn+
37
nac a|wypei gỽneuthur coniurasciỽn
38
arnaỽ y maen a uanagei idaỽ bop
39
peth o|r a ouynnei idaỽ. Sef a|ỽnaeth
40
garsi yna gỽneuthur coniurasciỽn
41
ar y maen. Ac ef a|welei yndaỽ yn am+
42
lỽc ry daruot y|r palmer dỽyn iosian yn
43
[ ỻathrut.
| « p 217v | p 218v » |