Oxford Jesus College MS. 111 (The Red Book of Hergest) – page 230r
Ystoria Bown de Hamtwn
230r
924
heb·y boỽn y py diỽ yd|oedeỽch yn credu.
Heb·y brenhin damascyl drỽc yd oedem yn
credu. Ac ueỻy y gỽnaeth an tadeu kyn no
ni. Y neb a|gredaỽd y|myỽn kelwydeu. mad+
deuit duỽ udunt. a ninneu heb y brenhined.
ac heb y pedwar admirales ny chredỽn ni
yn|bywyt udunt. ac anuon a|orugant yn
ol eu gỽraged a|e meibon. ac ereiỻ yn ol eu
tadeu. ac eu kyfnessafyeit. ac ỽynteu a
doethant yn|ỻawen. ny bu eiryoet yscol+
heic yr|daet darỻeawdyr uei a aỻei ennỽi
eu riuedi gan ueint y gynnuỻeitua. a maỽr
vu y ryuedaỽt meint a uedydywyt. kanys
pedwar|mis y parhaaỽd y bedyd. ac escob yn
pregethu udunt. ac ỽylaỽ a|orugant o edi+
uarỽch. a ffustaỽ cledyr eu dỽy·uron yr go+
gonyant y duỽ ac yr tristỽch y|r diaỽl. Yn
aỽr gỽarandeỽch am boỽn. anuon a|oruc
yn ol y pab. ac ynteu a|doeth attaỽ yn ufud.
a chyt ac ef deu escob. ac yscolheigon ereiỻ
ỻaỽer. ac hyt y|m·ratfỽrt y doethant. A
phan|doeth y pab yno. dyuot a|orugant yn
y|erbyn. maỽr a|bychan oed y|dyd. nyt am+
gen no|duỽ sulgỽynn. peri dỽyn y goron
rac wyneb. a|r pab a|e bendigaỽd. ac a|e do+
des ar benn boỽn ymladỽr. ac ar y ol ynteu
coronhau iosian. a maỽr uu y drythyỻỽch
a|r ỻewenyd a vu yna. A|phann|yttoedynt
ueỻy ar eu ỻewenyd nachaf pedeir ken+
nat yn dyuot rac bronn y brenhin. ac yn
amouyn sabaot. Pan gigleu sabaot y
amouyn. Mi heb ef yỽ yd yttyỽch yn|y am+
ouyn. Heb y kennadeu. brenhin ỻoegyr
a|diettiuedaỽd roboant dy uab. ac yna do+
luryaỽ a|oruc yn|uaỽr. a dywedut mae
drỽc oed hynny. Syr heb·y boỽn ti a bỽyỻy
mal kynt arglỽyd heb·y sabaot mal y
mynnych di. ac yna yd erchis sabaot
y|r kennadeu mynet ar urys att y wreic.
ac att y|uab roboant. y erchi udunt. bot
yn|y casteỻ hyt pan delei ef. a|r|kennadeu a
925
ymchoelassant heb un gohir. a maỽr uu
y ỻewenyd ymplith y barỽneit. ac ueỻy y
parhaaỽd mis kyflaỽn. a chywhynnu a|o+
ruc y pab a|thrigyaỽ a|oruc boỽn y|mỽm+
raỽnt. ac yna y|doeth terri y erchi ken+
nat y uynet y wlat. Nyt etto heb y bren+
hin. Reit uyd itt dyuot gyt a|mi y loegyr
y ganhorthỽyaỽ roboant. ac yn ỻawen heb
ynteu ỽrth dy orchymun. ac ymbarattoi
a|wnaethant. ac yna yd arwedaỽd gyt ac
ef can mil o uarchogyon aruaỽc clotuorus.
Ac yna y kychỽynnỽys boỽn uilỽr. a milys
y uab. a therri duc ciuil. a hyt y|ghylỽyn y
doethant att yr escob. ac odyna yd|aethant y
eu|ỻongeu. a hwylaỽ yny|doethant hyt yn ham+
tỽn. a|phan|welas gỽreic sabaot a roboant
ỽynt yn|dyuot. mynet yn eu|herbyn a|orugant.
A|phan y gỽelas boỽn ỽynt. amouyn ac ỽynt
a|oruc. Pa|beth a|daruu itti heb ef ỽrth robo+
ant. Myn duỽ arglỽyd urenhin heb ef mi
a|e dywedaf itt. bot brenhin ỻoegyr gỽedy
dỽyn y meint kyuoeth a|oed im. Myn vym
penn heb·y boỽn ni a|e goruydỽn. Sef a|oruc
rei o|r dref o nerth traet eu meirch ac eu hys+
parduneu. mynet hyt yn ỻundein. a mene+
gi am boỽn a|e lu. hyt na welsei dyn eiryo+
et eu kyffelyb o ueint. A phan gigleu y
brenhin hynny. ruglaỽ y dal a|oruc. ac
anuon ar|hyt ỻoegyr yn|ol y uarỽneit. A
phan glyỽssant y chỽedleu. dyuot a|orugant
yn ufud. ac ny orffỽyssassant hyt pan deu+
thant hyt yn|ỻundein. A gỽedy eu|dyuot at
y brenhin ef a|dywaỽt udunt dyuot boỽn
yn urenhin coronaỽc. a thebygu yd ỽyf i
heb ef mae y ryuelu a mi y deuth. ac y
mae arnaf i ofyn agheu. ac ỽrth hynny
un uerch yssyd ymi yn|ettiued. mi a|e rod+
af y uab ef os kynghorỽch chỽi. ac y|dywe+
dassant ỽynteu oỻ y|mae da oed y|kynghor
hỽnnỽ. ac anuon a|wnaeth escob ỻundein.
a phedwar ieirỻ ar|gennadỽri y annerch
| « p 229v | p 230v » |