BL Additional MS. 14,912 – page 71r
Meddyginiaethau
71r
aỽyr ac ir ỽynt a hỽy a|difflannant.
[ Araỻ yỽ gỽna plastyr o|r risc vchaf y|r he+
lic gỽinegyr a hynny a|e gỽeryt.
Rac heint caỻon berỽ risc y keginderỽ a risc
y dudrein a|r erllyryat a phỽrs y bugeil drỽy
dỽfyr rycheu yny el dan y drayan a gỽna
ruel o hỽnnỽ a blaỽt gỽenith peiỻeit.
[ Araỻ yỽ. kymer. y dỽfyr craỽn a ỻaeth geifyr
yn deu hanner a sugyn yr erỻyryat a berỽ
a gỽenithuein ac yf ixnieu heb diaỽt am+
Rac dolur dỽy·uron. kymer. laỽer o|e +[ gen
irin y koet a mortera yn fest a|chymysc a|ch+
ỽrỽ neỽyd a dot myỽn crochan prid neỽyd
yn|y ddayar dros y ymyleu a gat veỻy.ix.
nos a ixdieu a dyro y|r klaf yn gyntaf y
bore ac yn diỽethaf y nos.
Y wneuthyr gỽinegyr dot heidd glan ̷
myỽn gỽin nosỽeith. a|diỽarnaỽt.
| « p 70v | p 71v » |