BL Additional MS. 19,709 – page 49r
Brut y Brenhinoedd
49r
jeueinc y wlat rac bron eu tywyssaỽc a bỽrỽ pren
goel y·rydunt. a megys y del y coelbren vdunt yd e ̷+
tholir ac yd eỻygir y|wladoed y byt y|myỽn ỻogeu.
megẏs y gvely ti y geissaỽ gosymdeith. ac veỻy ryd+
hau an gỽlat o tra amhylder y bobyl. ac ar aỽr·hon
heb ef arglỽyd yd amlaỽys kiỽdaỽt yndi yny vu reit
ethol y veint ieuectit a wely ti yma rac dy vron. ac ̷
erchi udunt ufydhau ỽrth y|gynefaỽt a|r gyfreith a
oed ossodedic y·r y dechreu yn·di. a|niniheu y|deu vroder
a|wely|ti yn dywysogyon arnadunt kanys o|lin brenhin+
ed yd henym. Sef yỽ vy enỽ. i. hengist. a hors yỽ enỽ
vy mraỽt. a hynny arglỽyd a|ry|fu reit i|ninheu vfyd+
hau ỽrth y gyfreith a vuassei yr y dechreu. ac y doetham
y|th vrenhinyaeth titheu yn yd oed mercurius an duỽ yn
an tywyssaỽ. a|phan gigleu y brenhin kyrbỽyỻ mer+
curius drychafel y vyneb a|oruc a gofyn py ryỽ gret oed
gantunt. ac yna y dywaỽt hengist. arglỽyd heb eff.
an tatolyon dvyweu a|enrydedỽn. i*. nyt amgen. Sa+
turnus a jubiter a|r dvyeu ereiỻ yssyd yn ỻywyav y byt. ac
eissoes yn benhaf yd anrydedvn ni mercurius yr hỽn a
alwn. i. yn an jeith wogen. ac y hvnnv y parthvys an
ryeni y petwy·ryd dyd o|r vythnos. ac alwvn ninheu
o|e enỽ ef wogones. a hỽnỽ a elwir yg|kamroec duỽ
merchyr. ac yn nessaf y hỽnỽ yd enrydedvn y dvy+
wes gyfoethockaf o|r dỽyesseu yr hon a|elwir effram
ac y honno y kyssegrỽys an ryeni y|wechet dyd o|r
ỽythnos. ac yn an ieth* ni y gelwir fridei. Sef yỽ
| « p 48v | p 49v » |