NLW MS. 24029 (Boston 5) – page 55
Llyfr Blegywryd
55
dẏlẏ tẏgu ar|ẏ|seithuet o|r dẏnẏon nessaf
ẏ|werth. ar|ved ẏ|talaỽdẏr o|r dichaỽn ẏ|ga+
ffel. ac onnẏ|s dichaỽn. ar arỻaỽr gyssegre+
dic. gỽerthu ohonnaỽ ẏ|da idaỽ. a bot hỽnnỽ
ẏn vach kẏnnogẏn idaỽ. dros werth ẏ da.
Pwẏ|bẏnnac a|uo mach goruodaỽc dros
arall. nẏ rẏdheir hẏt ẏmpen vn dẏd a|blỽẏ+
dẏdẏn. Ac nẏ phoenir o vẏỽn hẏnnẏ dros
ẏ|cam a|wnnel hỽnnỽ. Kannẏs megẏs rỽ+
ẏmedic mẏwẏn* ẏr achaỽs. hẏnnẏ wẏpper
a|del|ẏ kẏlus ỽrth gẏfureith. ae na del kẏn
teruẏn. Pwẏ|bẏnnac a|gẏmero mach ar
dẏlẏet. a|marw ẏ|mach kẏn talu ẏ|dẏlẏet.
doet ar|ved ẏ mach. a|thẏget ar|ẏ seithu+
et o|r dẏnẏon nessaf ẏ werth. ẏ|rẏ|uot hỽ+
nnỽ ẏn vach idaỽ ar|ẏ|dẏlẏet. o|r keiff y|bed.
Ac onnẏ|s keiff; ar allawr gẏssegredic.
A|gỽedẏ hẏnnẏ ẏr arglỽẏd bieu kẏmell ẏ
vechni dros ẏ|marỽ. OS ẏ kẏnnogẏnn
a vẏd marw. a|r mach ẏn vẏw; dẏget ẏ
mach ẏ|vechni ẏn gẏffelẏb ẏ|hẏnnẏ gan
tẏgu e|hun ar|ved ẏ kẏnnogẏn. Ac ẏ|teir
ach nessaf ẏ|r talaỽdẏr a|talant ẏ|dẏlẏet
onnẏt enwis ẏ kẏnnogẏn gẏmẏn dros
ẏ|dẏlẏet. KẎt dẏcco mach ẏ|vechni ẏn
| « p 54 | p 56 » |