BL Cotton Cleopatra MS. B V part i – page 123r
Brenhinoedd y Saeson
123r
a dvntvn a dugessit dwy weith y arnadunt
ef a|y rodes drachevyn. Ac yna y bu varw Ed+
elredus vrenhin; ac y cladpwyt ef yn seynt y
Paulys yn llvndein. Sef oed hynny o oet crist.
mil o vlwynyded a.xiiij. Ac yna y doeth y saes+
son ac y detholassant yn vrenhin arnadunt
Edmvnd Jreneside mab Edelred o orderch.
A gwedy gwneithur Edmund yn vrenhin
ef a gymyrth Edrich iarll amwithic yn
ystiward idaw canys hynaf gwr oed o|r saes+
son; ar mwiaf a wydeat o drwc. A gwedy bod
mynych kyffrangheu ryngthunt; y doeth E+
drich o|y dwill y wneithur tagneved ryngthunt.
a rannv yr vrenhiniaeth yn deu hanner y·ryng+
thunt a gadel y Edmund y goron. Anno domini.m.
xv.y llas Oweyn vab dyfynwal. Anno domini.mxvi.
y llas Aydan vab blegywryt a|y betwar meib y
gan llywelyn vab Seissyl brenhin gwyned.
Anno domini.mxvij. yd oedit yn dadnabot twill
Edrich yn llys y brenhin. A gwedy gwibot o+
honaw hynny; ef a vynhei rynghu bod y Chno+
ut. ac a rodes rodeon llawer y vn o wassanaeth+
wyr Edmund yr y vrathu a ber haearn ar y hyd
y vyny pan elei yr geudy gyntaf. Ac val hyn+
ny y collas Edmund y eneit ac y clathpwyt yn
glastyngburie. ac yna y kymyrth Chnout y vren+
hiniaeth. canys ny vedylhit am elured nac am
edward meibion Edelredus vrenhin. y rei a oed
yn trigaw gyt ac ev mam yn normandi.
| « p 122v | p 123v » |