BL Cotton Titus MS. D IX – page 38v
Llyfr Blegywryd
38v
myn tri. a|gỽat dros waessaf. a|chof ỽedy
braỽt. TRi gỽeithret yssyd ar|braỽf. Llaf+
ur kyureithaỽl. neu a·ghyureithaỽl. ar
tir megys torri ffin. neu wneuthur ffin.
neu lauur arall. a gỽeithret llỽdyn yn
llad y|llall. yg|gỽyd bugeil trefgord. Ty+
stolyaeth y|bugeil yn|wybydyat a seif
am hynny. Tystolyaeth gỽybydyeit he+
uyt a seif am|tir. a gỽeithret kytleidyr.
lleidyr a|groccer am|y letrat. tystolya+
eth hỽnnỽ ar|y|gyt·leidyr a seif. TRi gỽ+
aessaf yssyd; ardelỽ. neu warant. neu
amdiffynn heb warant. TRi chof gỽedy
braỽt yssyd; godef o|vraỽdỽr gỽystyl yny*
erbyn y|vraỽt. heb rodi gỽrthỽystyl yna.
a|gỽedy hynny kynyc gỽystyl y|ỽ gat+
arnhau. ny dylyir y erbynnyaỽ o gyfreith
onny byd braỽt tremyc. neu gynnic
gỽystyl yn erbyn braỽt gỽedy godef.
neu adaỽ ymadraỽd yn wallus ar gyf+
ureith a barnn. a gỽedy barnn keissaỽ
gỽaret y wall. ny|s dyly. Teir tystoly+
aeth dilis yssyd; tystolyaeth llys yn dỽ+
yn cof. a thystolyaeth gỽybydyeit
a gredir pob vn y|ghyureith megys tat
rỽg y|deu vab. neu yn lluossaỽc am|tir.
| « p 38r | p 39r » |